Kawngpui sira lirthei dah

Aizawl Municipal Council leh Aizawl City Traffic-te chuan Aizawl khawpui chhunga kawngpui sira dan phal loha lirthei dahte an enfiah mek. MZ-01 F-7188 leh a hnu lama lirthei register-te chuan garage neia an inchhâl vek avangin F-7188 hnu lama lirthei, kawngpuia inhûngte lakah thuneitute thîkthu a chhe zual dawn a ni.

Aizawl khawpuiah mihring, in leh lirthei an pung zel a, tunah chuan veng kilkhawr deuh ni ṭhinah pawh lirthei hi hnawksak tham an awm ta vek mai. Lirthei dahna nei lote avangin mi tam takin harsatna an tawk mek a, lirthei dahna nei tura ṭan lak zel a pawimawh hle.

Aizawla local council ṭhen­khat chuan an huam chhungah kawngpuia lirthei riah an khap a, traffic police lamte nen thawkhoin ṭha takin an kalpui thei. Veng ṭhenkhatin kawngpui an humhalh ṭhat avangin an veng chhung bikah traffic jam a tlem phah a, khawtlangin ṭan an lak chuan lirthei dahna tur nei ngai lote pawhin a neih theih dan an ngaihtuah chawp mai a, veng ṭhenkhat chuan kawngpui chu a nihna tak angin an hmang thei ta.

Veng tam takah erawh kawng­pui kam hi lirthei riahna hmunah an la hmang a, hei hian harsatna a thlen nasa hle. Traffic jam a nasat phah a, rikrum thilah harsatna tam tak a thlen mek bawk. Kangṭhelh motor veivah harsa khawpa lirthei hung ṭhinte an awm a, tute emaw inthlahdah vangin chhiatna nasa zawk a thleng tawh ṭhin a ni.

Kawngpui hi lirthei riahna tur a ni lo tih kan hriat a ngai a, dan phal baka lirthei riah ṭhinte hi chu dan anga man zel mai tur a ni ang. Hetihlai hian sorkar hian khawpui daifem hmun remchangah hian zan riaka lirthei dahna hi siam ta se, man chawia dah niin chu pawisa chuan a vengtu turte pawh ruai se, lirthei dahna nei remchang lote pawhin zana an riahna tur hmun remchang zawn thiam chu a fuh mai thei.

Engpawhnise kawngpuia zana lirthei riah hi dan kalh a ni a, MZ-01 F-7188 hnua mi an ni emaw ni lo emaw pawh ni se, Aizawl khawpuia zana kawngpui kama lirthei riah ṭhin hi chu tihtawp a hun tawh takzet a ni.