Eptute leh sorkar khalh ngîl

MPCC President chuan tun hnaia Congress Bhavan political session-a thu a sawiah, sawhthing chungchangah Congress party-in mit an chhit kar a ngaih dawn thu te, an party-in ZPM kaihhruai Mizoram sorkar an duhsakna chu, an intiam angin kut hnathawktute thlai thar lei ngei se tih leh, chumi hma chuan ZPM sorkar chu tla mai lo se, tih a nih thu a sawi.

Congress party hotupa berin ZPM kaihhruai sorkarin sawhthing lei leh hralh chungchanga hma a lak danah mit an chhit kar dawn thu a sawi hi a ṭha hle mai a; sawhthingah chauh ni lo, sorkarin thlai a thlan dang - hmarcha, aieng leh hmunphiah lei leh hralh chungchangah pawh mit chhi tel reng se.

Opposition party-te mawh langsar tak chu sorkar khalh ngìl a ni a, hei hi eptu party-te hian rilru ngíl tak pu chung leh ram leh hnam hmangaihna thinlung nen kalpui se. Kut hnathawktute thlai thar lei leh hralh danah sorkarna chelhtu'n an intiam ang takin an kalpui leh kalpui lohte vil uluk se a ṭha. Thlai chungchang ni lo, thil dangah pawh sorkar a kal sual loh nan khalh ngìl hna lo thawk char char se ram tan a hlu hle ang.

Hetih lai hian, 'Sorkar khalh ngîl' tih hi sorkar sawiselna atan chhuanlamah hman theih a ni ve tho awm e. Thu dik tâwk lo leh dik tluantling lo hmanga sorkar sawichhiat erawh eptu party-te tih tur a ni bik lo. Thu dik tâwk lo hmanga sorkar sawisel chiam chiam hi ram leh hnam leh mipui tana ṭha leh hmasawnna tur a ni lo tih an hriat reng a ṭul.

Sorkar hi a ṭulnaah chuan sawisel tur a ni a, mahse, thu dik hmangin a ni tur a ni. Thu dik tâwk lo hmanga sawisel chiam chiam hi chu ram tan a ṭhatna a awm lo a, ruling party-te tan ngaih pawimawh chhan tur a awm lo bawk ang.

Sorkar hotute lam pawh an fimkhur tur a ni a, inthlan dawna an intiamnate tihhlawhtlin ngei an tum tur a ni. Thlai chi li, a man ṭha tawk tak bithliaha kut hnathawktute'n an thar chhuah lei an intiamna hi Mizoram kaihruai thlan tlin an nih chhan lian tak a nih hmel. An intiamna a nih piah lamah, thuneihna sang tak nei an nih theih chhan a ni tih an hriat chian a, an intiamna hi an tihpuitlin ngei ngei tur, tihmâkmawh a ni.