Office kal tlai sorkar mualphona

General Administration Department (GAD) chuan March 3, 2015 khan Office Memo­randum chhuah tharin, sorkar department tinte chu an office-ah surprise check neia pisa thlen huna thleng lote enfiah turin a hriattir a; March - May 2015 chhung khan mi 336-te casual leave ni chanve paihsak an ni a, mi pahnihte casual leave ni khat paihsak an ni.

Congress kaih­hruai sorkar a din ṭan dawn khan, Chief Minister-in sorkar officer rualte a ko khawm a, office-ah discipline kenkawh a duh thu a sawi a, office kai leh ban hun ngaihpawimawh a nih tur thu a sawi. Tun hnaia Mizoram chief secretary-te pawhin sorkar office kai leh ban huna khauh an duh thu an sawi vek tawh bawk a, tuna chief secretary pawh hian pisa kai hun hi a ngai pawimawh hle.

Chief minister ngaih pawi­mawh, chief secretary pawhin a ngaih pawimawh ni bawk chu sorkar office kai hun leh ban hun vawn dik a ni. Hei hi sorkar hnathawkten an zawm thei lo a nih chuan chief minister chak lo tak kan nei tihna a ni a, chief secretary a thu zawm hlawh lo tak kan nei tihna a ni bawk ang a, sorkar pumpui mualphona a ni ang.

Sikul naupangte ṭan hma turin sorkarin thuchhuah a siam a, dodalna awm ve bawk mah se tunah chuan Mizoram pumah sikul ṭan hma a ni tawh. Office-in ṭan hun leh ban hun mumal tak a nei a, sorkar aṭanga hlawh leh hamṭhatna tinreng dawngtute'n an office hunbi an vawng thei lo hi chu thil mak tak, thil inhmeh lo tak leh sorkara thawk ve lote tan phei chuan thil demawm tak a ni.

Mizoram sorkara mi pawi­mawh ber berin office hunbi vawn dik an duh a, hunbi vawng dik thei tura thu petu leh bawhzui theitu an ni bawk. Heti chunga office hunbi vawng dik lo sorkar hnathawk an la tam chuan sorkar mualphona a tih loh theih loh a, sorkar office hunbi vawn danah hian Mizoram sorkar hi a la mualpho zel dawn em?