Mizote leh lehkha chhiar

Mizoram State Central Library chuan kum 2014 chhung khan tlawhtu 6,608 an nei a, kuminah January-April chhungin tlawhtu mi 1,843 a nei tawh.

Mizorama library pui berin kum khat chhunga tlawhtu mi 6,608 lek a nei hian ngaihtuah a tithui a, Mizote hi lehkha chhiar thatchhe hnam kan ni zo ta nge, library kaltlang kher loin lehkhabu hi kan chhiar nasa ta zawk, tihte pawh ngaihtuah a ngai. Lehkhabu inpui berin kum khata tlawhtu a neih zat aṭanga thlir hi chuan, Mizo zingah lehkha chhiar ngainatu an tlahniam zel niin a lang a, a pawi hle a ni.

Lehkhabu ziaktu tam zawk hian a hralh a kal loh thu an sawi ṭhin a, hei hi pawisa kan neih loh vang ringawta puh chi a ni lo. Lehkhabu tam tham tak lei theihna tur pawisa chu thawmhnaw leh thil dang leina atan kan pe chhuak reng thei tho a, kan ṭhanlenna atana pawimawh leh hmasawnna leh finna min kawhhmuhtu lehkha chhiar hi kan thatchhe deuh deuh niin a lang.

Lehkha chhiar hi inkawhhmuh theih a ni a, zirna sikulahte hian tun aia uarin lehkha chhiar nasa turin infuih thar ila a sawt ang. Mi­zoramah chuan kohhranin thuin zawm a hlawh a, kohhran pawhin sunday school lam­ahte lehkha chhiar uar tura inzirtirna lam hi kalpui uar deuh deuh se a sawtin a rinawm a; ziak leh chhiar thiam tamna state nih ringawt hi a tawk lo a, lehkha chhiar kawnga ṭan kan lak thar a ṭul takzet a ni.