Mizote ei leh in

Health department-a Food Safety Commissioner chuan Mizorama zawrh ṭhin energy drink ṭhenkhat chu sorkar laipuia Food Safety & Standards Authority of India-in mihring hriselna atana ṭha loa a ngaih avangin India ram pumah zawrh leh hralh khap a nih thu a chhuah a, Mizoramah pawh zawrh phal a ni lo.

Mizote hian kawng tam takah hma kan sawn tawh a, kan ei leh in chungchangah erawh hmasawnna tur a la tam hle. Thing­tlang lam leh mi­rethei zawkte tan chuan ei leh inah duhthlan theih a ni lo a, an hmuh ang leh an ban phaka awm apiang an ei mai a ṭul. Hetihlai hian sum leh pai hnianghnar zawk, khawvel tukverha dak chhuak phaa inngai tawh zingah pawh ei leh in kawnga insum leh inven nachang hre lo an la tam hle.

Tun hma deuh kha chuan duh hunah duh ang zat sa lei tur a awm ngai lo a, khawpuiah chuan duh hun hunah kan duh ang zat sa lei tur a awm ta. Hei vang pawh hi a ni mah na, Mizote hian sa hi kan ei nasain kan dah sang em em a, chawhmeh ṭha leh induhsakna bera kan neih pawh sa insiamsak a ni. Hetihlai hian kan sa ei hi a hrisel leh hrisel loh, khawi aṭanga lo kal nge a nih tih leh sa ei tamin a nghawng theih lamte kan ngaihtuah ngai tel lo.

Hmawmsawm kan ei tam takte pawh hi a siamtute leh an siam dan lam kan ngaihtuah thleng phak lo a, a 'tui' kan tiha a leina man kan neih bawk chuan kan ei duak duak mai a ni ber. Kan ei leh inte hi a hrisel tawk lo a ni mai thei, Mizote hi hnam hrisel lo tak kan niin a lang a, ei leh in lamah hian insumin fimkhur thiam ila tun ai hian kan hrisel zawk ang a, kan dam rei zawk deuh bawkin a rinawm.

Sorkar laipuiin mihringte hriselna atana ṭha lo an puangzar a, hengte hi ngaihvena taksa tana ṭha lo laka insum hi a ngai hle. Heng thilah chauh pawh ni lo, taksa tichhe thei leh hrisel lohna thlen zui thei thil ei leh in tur tam tak a awm a, hengte hi fimkhur taka kan thliar thiam a hun tawh takzet a; taksa tana ṭha lo chu kan ei loh ngam/phal a hun ve ta.