Zokhawthar buaina leh sorkar

Tun hnaiah Zokhawthar leh a chhehvela Assam Rufles-te chet dan duh loin mipui an pungkhawm a, mipuite hian AR-te chu sumdawnnaa inrawlha mipui tana harsatna siamah an puh a ni. Zokhawthar mipuite chuan AR-te chu mipui sumdawnna tibuai zawnga che-ah puhin lirthei ṭhenkhat an mante chhuah turin an phût a, Mizoram Police-in ban an phar a, buaina lian tham a chhuak lo. 

Tun hnai mai khan Law & Judicial mi­nister chuan Zokhaw­thar tlawhin Immi­gration Check Post leh Integrated Check Post peih fel thuai tur a nih thu a sawi a, sorkarin ramria insum­dawn tawnnaa harsatna awm ṭhinte a hriat reng thu a sawi a; minister-in Zokhawthar a tlawh hnu lawkah buaina a awm zui ta a, sorkarin engtin nge a chin fel dawn tih hi mipuiin an thlir reng ang. 

Ngun taka ngaihtuah ngai chu, "Helaia insumdawn tawnna hi dan anga kalpui a ni nge ni lo?" tih hi a ni a, dan ang thlapa kalpui a nih loh a, sumdawngte'n sorkara chhiah an chhun luh bawk si loh chuan helaia Custom duty-te leh sipai duty-te hian 'post mawm' hmuhin an lo hmu ve reng thei. Zep thu a cheng lo, Mizorama police-te ngei pawhin fiamthuin Zokhawthara duty hi a 'hlawk' thu an sawi ve fo ṭhin a ni. 

Hei vang tak hian Zokhawthar kal tlanga Myanmar leh Mizoram (India) insum­­dawn tawnna hi heti ngawta dah mai chi a ni lo a, sorkarin huaisen taka a hawi lam tur a hawi ngam a ṭul khawp mai. Dan ang takin kan kalpui tawh dawn nge, tuna mi ang hian inhriatthiam tawnnain kan la kal zel dawn, tihte pawh rel fel ngam a ngai tawh a; khilaia sumdawng leh lirthei neitu pawlte thu thu anga insumdawn tawnna lian tham kaltir reng pawh hi a fuh ber lo thei. 

Hetiang hunah hian sorkar a huaisen ngam a ngai a, Mizoram leh Mizo mipuite tana ṭha ber, nakin zela ṭha tur thlira thutlukna an siam ngam a hun ta.