AMC thuneihna pek

UD&PA department hotute leh Aizawl Municipal Council (AMC) hotute chu tun hnaiah an inkawm a, Indian Constitution 12th Schedule-in urban local body-te tih tur a siam 18 zinga AMC kuta la hlan loh 10-te hlan dan tur kawng zawn ni se, an ti.

AMC hian an term hmasa ber an hmang zo dawn tawh a, roreltu ṭum thum an insiksawina a lo ni ta. Tunah an term a tawp dawn hnai tawh a, term tawp dawn lamah AMC-a thuneithna sang zawk pek sawi rik a ni.

AMC hi a nihna tur angin an la kal thei lo a, a bulṭanna a nih vangin anmahni lam an la inpeih lo a, sorkar pawh a la inpeih lo a, chuvangin zawi zawia thuneihna pek chhoh pawh hi ruahmanna fing tak a ni. Chutihlaiin AMC hruaitu thlan dawn hnaihah thuneihna sang zawk pek sawi chhuah a ni a, inthlan hmaa thuneihna sang zawk pek an nih a, hna an thawk hman a nih chuan tuna AMC hruaitute tan chuan inthlan lo awm leh tur hmachhawn hi a nuam sawt ngeiin a rinawm.

AMC kalphung en hian an term hmasa berah hna an thawk chhe lo a, chutih rualin thuneihna ûma an inbeih dan leh an kal dan en hi chuan Mizo mipuiin municipal council kan hmelhriat dan hmasa hi chu a fuh lo palh ang tih a hlauhawm hle. Engpawhnise AMC hian dan hnuaia thuneihna an neih theih chin chu an phû angin dawng se la, hengte hi AMC inthlan lo awm tur nen thil inzawm a ni lo turah i ngai phawt ang.