Ni tin mamawh a pawimawh hmasa

Chief Minister chuan December 11, 2024-a Champhai Chhangphut Field-ah flood light a hawnnaah, Mizoram sorkarin hmasawnna infiamnaah hmasawnna thlen a duh rualin, kawngpui, zirna, hriselna lam, kut hnathawktute chawi kân leh police thuam chakte inbûk tâwk taka kalpui tum a nih thu a sawi.

Mizote'n infiamna lamah hma kan sawn viau tawh; kan hmasawnnate hi hmunhma neih ṭhat tawh vang te, infiammite hmathlir a thui tawh vang te, infiamna hrang hrangte eizawnna tling a ni tih hriatna vangte leh chhan dang dang vangte a ni ang.

Infiamna lama hmasawn tur hian hmunhma, bungrua leh hmanrua neih ṭhat a ṭul a, sorkar pawhin theihtawp an chhuah ṭhin; tunah chuan kan nei ṭha ve tial tial a, a lawmawm.

Chutih laiin, mipui nâwlpui ni tin mamawh lamah Mizoram dinhmun a la ṭha lo a, a la him lo hle. Eng emaw hlekah ram pum anga harsatna tâwk mai thei reng kan la ni.

Chuvangin, Chief Minister-in infiamnaah hmasawnna thlen an duh rualin, kawngpui, zirna, hriselna lam, kut hnathawktute chawi kân leh police thuam chakte inbûk tâwk taka kalpui tum a nih thu a sawi a dik a, a pawimawh tak zet.

Mizoram mipui zat aṭanga chhûtin infiamna lama kal chu mi tam lo tak an ni a, eizawnna atana infiamna hmang thei khawpa theihna leh thiamna nei phei chu an tlêm hle. Infiammite tihhmasawn nan theihtawp chhuah a ṭhat rualin, a aia pawimawh zawk - mipui nâwlpui mamawh ngaih pawimawh hmasak a ṭul zawk tih hriat a ṭha.

Infiammite pawh tel vekin ram mipui zawng zawngin kan ni tin nunah mamawh hmasa kan nei; kawngpui ṭha, ei/in tur leh kawlphetha leh eirawngbawlna gas hnianghnar, zirna leh hriselna lama inenkawlna ṭha leh changtlung neih hi pawimawh hmasa a ni.

Sorkar hian thil dang zawng aiin mipui náwlpui ni tin mamawh pek a ngai pawimawh hmasa se; kawng hrang hrangah hmasawnna rualkhai leh inbûk tâwk kalpui turin ngaihtuahna uluk taka sêngin hma la rawh se.