Hnathawktu lak dan fel lo

Zirna sang zawkte hamṭhatna tura din, Rashtriya Uchchatar Shiksha Abhiyan (RUSA) hnuaiah dan lo leh advertisement chhuah loa thawktu lak a awm niin Mizo Students' Union (MSU) chuan an tarlang a; Mizoram RUSA hnuaia inrêlbàwl hna bul an ṭan dan chu ṭha tâwk lo hlea an ngaih thu an sawi.

Mizorama kan buaina lian tak chu engkim maiah sorkara kan innghat lutuk hi a ni a, sorkar pawn lamah 'hna nghet' awm loa kan hriat ṭhin avangin sorkar hna hi kan inchuh nasa hle. Sorkarah a nghet emaw nghet loa hna thar lak a nih dawnin dan anga vantlang hnena hriattirna chhuah ṭhin tur a ni a, thla thum chin thawk tur chu Employment Exchange kaltlanga lak tur a nihlaiin RUSA thawktu hi dan lo anga lak niin an sawi.

Mipuiin RUSA pawh kan hmelhriat ṭan dawn chauha hnathawktu lak dana thil fel lo nia puh tur a awm leh nghal mai hi a vanduaithlak a, rah ṭha a chhuah loh phah ang tih a hlauhthawnawm hle. Zep thu a cheng lo a, SSA kalpui a nih ṭan danah thil fuh lo tam tak a awm a, sum hman dan leh haichhuah dan te, hnathawktu lâk dante leh an kalphungah fel tawk lo a tam hle. Mizoram University-a hna­thawktu lakah pawh thil kalpui fuh lo leh sawisel kai a awm nual bawk a, zirna kaih­hnawiha thil fel lo awm ṭhin hi ram tan a pawi hle a ni.

RUSA bul ṭan a ni dawn a, hnathawktu lak danah thil fel lo a awm a nih chuan a rang thei ang bera chinfel ni se, Mizoram sorkar hian dikna laltir a duh a nih chuan RUSA hnuaia hnathawktu lak dan hi a sawifiah ngei tur a ni ang.