Ṭhál chhunga kawngpui siam zawh

PWD Minister chuan, tun ṭhál chhungin Mizorama kawngpuite siam hna zualpui thawh zawh hman tum a nih thu leh chumi tur chuan theihtawp an chhuah mek thu a sawi.

Mi tin ngaih pawimawh zawng a inang lo a, vei zawng leh duhthusam a inang lo. Sorkar hotute tan pawh mi tin duhthusama ṭhain thil zawng zawng kalpui theih a ni lo ang. Kawngpui ṭha neih erawh mi tin duhthusam leh Mizoram mipui rualawhna lian ber pakhat a nih a rinawm.

Kawngpui ṭha neih hi hmingṭhat hlawhna leh mualpho lohna kawng awlsam tak pakhat, 'Sorkar ṭha' tia mipuiin ngaihdan an neih theihna ṭha tak a ni. A pawimawh zawk erawh chu - hmingṭhat hlawh hrim hrim ni loin, mipui tana sorkar awm chhan tihpuitlinna a nihna hi a ni. Hei tak hi sorkar pawhin an ngaih pawimawh tur a ni a, kawngpui ṭha siam hi ngaih pawimawh ber pakhatah nei rawh se - ram hmasawnna tura pawimawh ber pakhat a ni.

Mizoram sorkarin October 2024 aṭangin tuialhtheiah Road Maintenance Cess a la thar a, petrol leh diesel litre khatah Rs 2 zel lak a ni. He cess hi kawngpui siamna tur a nih thu Chief Minister-in a lo sawi tawh.

Tuialhtheia chhiah thar, Road Maintenance Cess lak a nih tâk avang hian mipuiin tun hma zawng aia kawngpui ṭha sorkar lakah an beisei tawh a, sorkar a ṭan lehzual a ngai ang. Kawng siamna atana tuialhtheia chhiah lâk hi a tam tham a, hmun dang aṭanga sum hmuhte nen phei chuan tun hma zawng aiin kawngpui siamna tur sum a tam tawh dawn. Hengte avang hian mipui hnena kawngpui ṭha lehzual pek hi sorkar mawhphurhna a ni.

Kuminah fûr a rei a, ruahtui a tam bawk a, Mizoram hmun hrang hrangah kawngpui a chhe hle a, mipui phun thâwm pawh a ring. Khua a tuihul ta a, sorkar pawhin hmun hrang hrangah kawng a thawm ṭha mek zel.

PWD Minister-in a sawi angin, Mizorama kawngpui hrang hrangte hi tun ṭhâl chhunga siam zawh hman ni thei se duhthusam a ni. Chutiang tur chuan sorkar hi ṭang se la, ngaih pawimawh bikah nei zui se; thawktute pawh ṭang sauh sauh rawh se.