Lui humhalh

Fisheries department chuan tun hnai khan Aizawl district chhung luia sangha humhalh ṭha tlawmngai pawl panga hnenah lawmpuina Rs. 40,000 ṭheuh an hlan a; heng pawlte hian an huam chhunga luia sanghate chu dan phal loha man an nih lohna turin an theih angin an veng ṭhin a ni.

Mizorama thil lawmawm deuh mai chu khaw tam zawkin an khaw ram leh a chhehvela lui awmte humhalh duhna an nei ta hi a ni a, hei hian sangha leh luia nungcha awmte nasa takin a chhan mek a ni. Khaw tam tak chuan duty-te hial siamin an khaw ram chhung luia sangha leh nungchate tura hrai an awm leh awm loh an vil a, bomb, generator leh dan phal loh chi dang hmanga sangha man tumte an veng ṭhin a ni.

Khawtlang duty an awm hnuah bomb leh thil ṭha lo dang hmanga sangha man hi a tlem tawlh tawlh a, hetihlai hian hmun tam takah chuan ualau takin luia nungchate hi dan phal loh hmanga man ṭhin an ni. Tun hnaia Mizorama lui an khuah lian ber ni ta chu Serlui hi a nih hmel a, kawlphetha an siamna tura an khuahah hian sangha lian ṭhahnem tak an awm a, he luia sanghate hi mi ṭhenkhatin bomb hmangin tun thlengin an la man ṭhin nia sawi a awm a, thuneitu lamin an enfiah a ṭha khawp mai.

Luia sangha kan humhalh hian a man tumte kan inveng hi a ṭha a, chutih rualin Mizo­ram luia sangha chi dang chhuah chiam maite hi a finthlak ber em, tih hi mithiamte'n an zir chian a ngai. Mizoram luia sangha awm sate tana hnawksak thei sangha chi dang kan lo chhuah palh thei a, hengte hi Fisheries department lam hian mumal taka zirchianna an nei turah ngai ila, an lo nei lo a nih chuan uluk taka zir chian hnuah sangha chi chhuah tur hi an zawn a ṭha awm e.

Mizorama kan lui neihte hi a humhalh theitu chu a chhunga cheng Mizote hi kan ni a, mahni luia nungchate tur leh dan phal loh hmanga man hi bansan tawh ila, khaw tinin mahni rama lui awmte kan theihna zawn ṭheuhah i humhalh ang u.