Mamawhna hmunah sorkar hnathawk

NLUP Implementing Board (NIB) chairman chuan tun hnaiah Hliappui khuaa NLUP bawng vulhtute a tlawh a,NLUP bawng vulhtute zingah Hliappui khua chu a tiṭha ber an nih a rin thu a sawi. Hliappui khawtlang hruaitute chuan an khuaah AH&Vety department mi leh sa an awm loh thu leh bawng vulhah an hlawhtlin avangin Vety officer pakhat talin ṭhutchilh thei se an duh thu an lo thlen.

Sum tam tak sengin NLUP kalpui a ni a, mi ṭhehnem takin hlawhtlinpui mah se hlawhtlinpui lem lo tam tak an awm a, sum eng emaw zat phei chu a nihna tura hman pawh a tumin an tum lo a, a riral a ni. Hetihlaia NLUP hlawhtlinpuitu khua an awm hi an chhuanawm a, Hliappui khuain bawng vulh thlanga a hlawhtlin theihna tura ruahmanna fel tak an duang hi an entawntlak hle a ni.

Bawng vulh thlangtute'n Vety officer an mamawh thu an thlen hi ngun taka ngaihtuah chi a ni a, sorkar tan vawi leh khata tihhlawhtlin theih a ni kher lo ang a; nimahsela Vety lam mi leh sain uluk zawka an vil theih dan tura ruahmanna siam hi sorkar bat a ni. Sorkarin flagship programme-ah NLUP a hmang a, chu chu hlawhtling taka kalpuiin bawng vulh kawngah ṭha takin an thawk a, an bawng vulhte enkawlsaktu tur mi thiam hi chu sorkar lamin an ngaihtuah ngei tur a ni ang.

Sorkar hian kalphung a nei a, a hnathawkte awmna tur hmunte hi rel fel sa vek a nei a, dan naranin thing­tlangah hi chuan zirna leh mihring hri­selna enkawltu lam lo hi chu an awm meuh lo. Hetihlai hian mamawh bikna hmunah hi chuan sorkar pawh a in­siam­rem ve mai a ṭha zawk a, mipuiin an ma­mawhna a sanna hmuna sorkar mi leh sa tirh hi an tih tur dik tak a ni.

Sorkarin policy a duang a, chumi tihlawhtlingtu Hliappui chuan sorkarah an mamawh an thlen lêt ve ta thung. Hei hi sorkarin a takin chhang ngei se, an bawng vulhte enkawltu tur hi a ngheta an dah thei lo a nih pawhin hunbi neia endiktu tal an pe ngei tur a ni. Sorkar hnathawkte hi mipui tana hnathawktu tur an ni a, mipuiin an mamawhna hmuna sorkar hnathawkte sem zai thiam hi sorkar mawhphurhna a ni e.