Sorkarin buh hûm lei zel se

Mizoram sorkar chuan Kolasib leh Mamit district-a buh tharte a hûmin a lei ṭan a, kg. khat Rs 30-in a lei nia sawi a ni. Agriculture Minister chuan sorkarin buh hûm a leite chu buhfaia chantir a nih hnuah mipui hnenah ration buhfai atan pek chhuah tur a nih thu a sawi.

Mizorama buh tharte a hûma sorkarin ration buhfai anga mipuia pek chhuah leh tura a lei hi a ṭha hle mai a, buh thartu kut hnathawktute pawh an lâwm hlein a rinawm. Mizorama thil la thleng ngai lo anga sawi theih a ni a; Agriculture Minister-in a sawi angin, Mizoram tan méllung pawimawh takah a ngaih theih àwm e.

Sorkarin Mizoram chhunga thar buh (hûm) a lei ṭan hi pilot project anga kalpui rih a ni a, Mizoran pumah kalpui a la ni lo tih sawi a ni. Tuna lei dan hi sorkarin a tlin tâwk a ni rih a nih a rinawm a; hun lo la kal zel turah uar zawka kalpui a, Mizoram kil tina buh thartute'n an hralh theih nan remchang siam chhoh zel ni se a duhawm.

Mizorama buh tharte hi hralhna a awm meuh lo a, suma chantir theih a ni lo reng a, chutih laiin, man tlâwm taka lei tur vaibuh hnianghnâr takin a awm reng bawk. Hengte avang hian Mizorama thingtlang khaw tam takah chuan buh chìn an uar tawh lo a, suma chantir theih thlai leh thei chìn uar zawkna khaw tam tak a awm tawh.

Ration buhfaia rin theih tura sorkarin Mizorama thar buh (hûm) a lei chhunzawm zel thei a nih chuan thingtlang lamah pawh buh chin an uar thar leh theiin a rinawm. Buh chìn uar thar leh a nih chuan buh thar pawh a tam ngei dawn a, Mizo chaw pui ber buha intodelh theihna kawng ṭha tak a ni ang.

Mizorama thar buh hûm lei hi sorkar hian chawlhsan lo se, kum dang zelah pawh tam zawk lei thei turin inbuatsaih chho se; a leina tur sum pawh budget-ah tam zawk dah ni se a ṭha hle ang. Kut hnathawktute pawhin tam zawk thar turin ṭan la chho se a duhawm.