Thingphun humhalh

Tun hnaiah Mizoram pumah Green Mizoram Day hman a ni a, record-a a lan danin kum 1999-2014 chhungin thing ṭiak nuai 36 chuang phun a ni tawh.

Mizoramah hian thing phun nun hi a harsa lem lo a, ruahtui tlak tamna ram a ni a, a leilungin a zir bawk avangin thing hi harsa lo taka phun nun theih a ni. Hei vang hian Green Mizoram Day hman ṭhina thing phun tam tak pawh hi a hung ṭhain a tir lama mite phei chu kawngpui tinuam thei khawpin an ṭhang lian tawh a ni.

Hetihlai hian Mizoram dung leh vang han thlir hian kum 1999-2014 inkara thing ṭiak nuai 36 an phunna hnuhma erawh hmuh thiam a harsa hle mai a, thing ṭiak nuai 36 zet mai kawng kamah deuh vek phun a nih tak tak chuan, Mizorama kawngpui dung lunlai hi chu ngaw deuh khup tawh awm tak a ni.

Thing ṭiak kan phun tam viaulaia thingkung ding a tlem chhan chu a enkawl kawngah kan thawk ṭha tawk lo tih a chiang a, ṭan lak thar kan mamawh hle. Tun hnaiah Green Mizoram Day-a ram hruaitute thusawi pawh a inthlak chho zel a, thing phun uar tura infuihna aiin thing phun sa enkawl uluk tura infuihna a ri tam ta a, hei hi a taka bawhzui a ṭha khawp mai.

Ṭhahnemngai taka sum senga kan thing phunte hi ṭhang lian loa an thi mai a nih chuan sum, tha leh hun khawhralna mai an chang thei dawn a, chuvangin Green Mizoram Day ni kher loah hian thing phun tawh sa enkawlna hun pawh hi sorkar lam hian ruat ṭhin se, ṭan la thar zel se a ṭha khawp mai.