Rilru fîm takin hunpui i hmang ang u

Krismas kan hnaih ta hle a, Vanglaini chanchinbu pawh vawiin hi kumin 2024-a a chhuah hun hnuhnung ber a lo ni ta reng mai. Kumtluana chawlh mumal pawh nei hlei thei lo chunga harsatna lian awm loa tun hun min hruai thlengtu Pathian hruaina a ropui tak zet.

Media-te hi mi chanchin ziaka chhuah ṭhin kan ni a, mi ṭhenkhat tana thu lawmawm te, ṭhenkhat tana thu lawmawm loh leh mualpho theihnate chhuah loh theih a ni lo. Kuminah pawh mi rilru leh thinlung na ngawih ngawiha siam kan nei mai thei a, tih dik loh palhte pawh kan nei. Heng zawng zawngah hian hriatthiam kan ngai hle a; chutih laiin, kan phû loa min faktute leh min fuihtute an awm a, min tichaktu an ni.

Mizote'n hunpui kan ngaihhlut ber hi mi ṭhenkhat chuan nun kawng sual zawh ṭanna hun atan te, nun pumpui a ṭha lo zawnga her danglamtu leh nakin zela inchhìrna tur thil tihna hun atante an lo hmang tawh ṭhin.

Chuvangin, Mizo mipui, a bikin ṭhalaite fimkhur ila, a hnu lama kan inchhîrna tur leh kan nun kal zel tur tichhe thei thil kan tih loh nan rilru fîm tak nen Krismas leh kum thar i hmang ang u.

Krismas hi a neitu, chhandamtu Isua Krista duh danin hman tum ṭheuh ila, mahni chhungkua leh khawtlangah harsatna leh buaina thlentu ni loin, remna leh malsawmna thlentu ni tum ṭheuh ila. Sorkar duh loh, sorkarin a khap thilte pawh ti lo tlang ṭheuh ila. Chutianga kan hman ngat chuan a ṭha zawnga Krismas hriat reng tlak a ni ngei ang.

Vanglaini chhiartu zawng zawngte Krismas leh kumthar hlim leh lawm taka an hman ṭheuh kan duhsak a, mahni hmun ṭheuhah mi dangte duhsakna leh hriatthiamna rilru pu chunga hunpui thleng mek hi hmanga lawm turin duhsakna chibai ṭha ber kan hlàn e.