Hlim takin, thianghlim takin

Kristiante hunpui Krismas urlâwk ni a lo ni leh ta reng mai. Krismas urlâwk zan leh Krismas ni hlim taka hmang turin duhsakna kan inhlan nawn leh e.

Kan hriat theuh angin Krismas hi chhandamtu Isua Krista pian cham a ni a, Krismas neitu pawh Isua a ni. Pian champha lawmnaah hian mi pawimawh ber chu pian champha neitu an ni thin a. Chutiang bawk chuan Krismas-ah pawh hian kan ngaih pawimawh ber tur chu Isua a ni. Isua chu suala tlu tawh mihringte chhandamtu a ni a, sualna nei lo, mi famkim a ni. Isua hnung zuitu, amah ringtu kan nih angin a pian champha leh urlawknaah hian Isua ngai pawimawh berin, a duh dana hman hi kan tih tur a ni.

Krismas urlawk zanah hian hlim tur a ni a, thianghlim tak, nuam tak siin hman theih a ni. Hman nawm lutuk tum avanga thil tha lo tih nan te, Isua Krista, kan nu leh pa te, sorkar leh khawtlang duh loh zawng tih nante hmang lo thei ila duhthusam a ni.

Krismas urlawk zana kan hlimna leh nuam kan tihnate nakin zela kan nun tichhetu, mualphona leh harsatna min thlentu, retheihnaa min hnûk luttu a nih loh nan fimkhur takin, hlim tak leh nuam takin, thianghlim tak siin kan hman tlan a pawimawh tak zet a ni.