Krismas kum thar ruai hlutna

Vawiin December 26 hi Krismas lawmna ruai theh ní a ni a, Mizorama kohhran tam berin ruai an theh dawn. Krismas ní tak Pathianni anga serh a, a tuka ruai theh hi tun hma atang tawha Mizorama kohhran tam berte kal dan a ni a; Krismas nía ruai theh nghal kohhran an awm nual thin bawk.

Khawtlang huap ruai, Krismas leh kum thar lawmna ruai ang chi hi a hautak hle mai a, Aizawla kohhran tam takah phei chuan senso zat hi mi pakhat hisâpin chhût ta ila, mi pakhat tana sum sen zat hi a tam hlein a rinawm. A hahthlak em em bawk a, tha sen a ngai tam hle. A kúl a taia tangte an hah tak zet a, an buai em em bawk. Tha sen zat pawh hi inhlawhna rate anga chhut ni ta se, a hlutna a sang hle ang.

Krismas leh kum thar ruai siamna atana sum leh pai sen zat leh tha sen zatte hi a hlutna suma chhût vek ni phei se la chuan a tam zual hle ang. Chaw vawi khat ei atana kan insensona, kan hah dan leh buai dante hi ngaihtuah chuan, a inphú lo ti zawng pawhin a ngaituah theih awm e.

Krismas leh kum thar ruai buatsaih hi a hautak hle rual hian, a hlutna kan ngaihtuah tel erawh a tul. Kohhran mite tipumkhattu, lungrualna thlentu leh thawhhona tha siamtu a ni a, hei ringawt pawh hi a hlu tak zet. Hei hi chu suma teh theih pawh a ni lo.

Krismas leh kum thar ruai theh hi Mizo hnam nunphunga bet tawh, kan culture pakhat a ni. Hengte vang hian Krismas leh kum thar ruai khawtlang huapa siam hi hautak hle mah se, a hlutna hrang hrangte avang hian bànsan mai loin, hun lo la kal zel turah pawh chhunzawm zel ila, ngaihlu zual zel ila a duhawm.