Halpuah hâl lui lo ila

Mizorama halpuah hal uar ber zan, December 31 kan hnaih ta hle mai. Halpuah hal chak tak tak an tamin a rinawm a, chutih laiin, sorkarin a khap thung a, kohhran leh YMA lamin hal lo turin na takin Mizoram mipui an ngen bawk.

Tunah hian sorkarin halpuah khapna hi khawng takin a kalpui mek a, police-te leh thuneitu hrang hrangin theihtawp chhuahin khapna thupek an bawhzui a, kohhrante'n halpuah hal lo tura ngenna kohhran inkhawmahte an tichhuak a, YMA-in nasa takin tan an la bawk.

Sorkar, YMA leh kohhrante'n nasa taka hma an la chunga halpuah kan la hâl tâlh a nih chuan kan inenfiah fé a ngai ang. Sorkar, kohhran leh YMA thu awih lohna leh palzûtna a ni dawn a; hengte thu ber kan zawm theih loh chuan kan ram kal zel tur chu ngaihtuahawm tak a ni thei awm e.

Sorkar dan leh thupekte hi khua leh tuite zawm tur a ni a, kan himna tur leh kan tana tha tur a ni tih hi chiang thar leh ila a duhawm hle mai.