Police tih âwma mawi

Mizoram police-te chuan, tualthah thubuai vanga man Central Jail aṭanga tlanbo chu tun hnai khan an man. Jail tang thlalak leh a mantute'n silaia an tinlai thlalak hi social media-ah a darh nasa hle.

Hetianga police-in an mi man thlalak an tihdarh hi a vawi khatna a ni lo a, hel pawl mi leh sa an man pawh thla an lakpui a, an tidarh chiam tawh bawk. Heng thlalakte hi anmahni tana an lak, an tum loh deuha lo darh palh pawh a ni thei a; nimahsela police tiha mawi lo a nih vangin ching chhunzawm tawh lo se a ṭha ang.

Mizoram Police-te hi India rama police ṭha ber ang hiala sawi ṭhin an ni a, India rama ṭha ber an nihna lai pawh a la awm ngei ang a; nimahsela an
ṭhat tawk lohna lam pawh hi sawi chhuah a ṭha a, hei hi anni lam pawhin an mamawh, an insiamṭhatna tur a ni ang.

Tun hnaiah Police zingah han en mai pawha taksa fit lo, police a nihna anga chhawr hleihtheih loh tur hmuh tur an awm nual. Zu leh ruihhloa fihlim lo police kan nei ngah hi a vanduaithlak a, ngawlvei emaw tih hial tur khawp kan kawl tlatte hi a pawi hle a ni.

Tun ai hian Police hotu lam hian insawizawite hi uar se, Police officer aṭangin physical exercise hi a takin kalpui se, tunah hi chuan Police uni-form an phelh rual ruala civil mi ang leka khawsa zui mai ṭhin Police kan kawl hnem hle a, insiam ṭhat theih a ni ang.

Police-te hi mipuite thla-muantu tur an ni a, an tiha mawi leh mawi lo chin hi a awm a, Police tih âwm tak zel hi ti thei se, duhthusama awm chu thil theih loh ni mah se tun aia ṭha zawkin Mizoram Police-te hi an tum chuan an la insiam
ṭha thei a ni.