Mihringte leh hunbi chhiar

Mihringte hian hunbi kan chhiarah hian ní eng emaw a lo thlen hian danglamna eng emaw tak awm tur hian kan beisei fo a; a tak takah chuan thil danglam tak beisei chiam tur a awm lo. Hun hi a kal ngaiin a kal mawp mawp mai a ni.

Halpuah leh halmawi khap chungchangah, mi thenkhatin hâl an châk tlat chhan leh halpuah hâl loh vanga ho riau leh khawharthlak riau tura an ngaih chhan hi chu danglam riau tura an ngaih vang niin a lang.

Mihringte hunbi chhiar danah kum thar a lo thleng a, kum a thar avanga halpuah leh halmawi hal chiam avangin chu kum thar chu a ropui phah lo a, halpuah/halmawi hal a awm loh avangin kum thar chu a nêp phah hek lo.

A nihna takah chuan ni dang angin danglamna a nei lem lo. December 31, 2024 hi Thawhlehni a ni a, January 1, 2024 hi Nilaini a ni. December 17, 2024 Thawhlehni leh a tuk December 18, 2024 Nilaini nen khan danglamna tehchiam a awm lo. Ni chhiar danah Thawhlehni leh Nilaini indawt ve ve a ni a, calendar-ah ni zat a danglam mai chauh a ni.

Zingah ní a lo chhuak a, tlaiah a tla a, a tûkah ni a chhuak leh a, tlaiah a tla leh a. Chutiang chuan khawvel hi a kal mawp mawp a ni. Hun a kal zel avangin kan danglam ve hret hret a, kan thih ní kan hnaih tial tial.

A pawimawh ber chu kan dam chhan kan hriat chian a, kan dam chhan ang taka Pathian hre reng chunga hun hman a ni. Kan hlim tur a ni a, kan hlimna tur pawh kan zawng tur a ni; mahse, kan hlimnate leh hlimna kan zawnnate hi mi dang tana hnawksak leh harsatna siamtu ni suh se.