Eiruk a bo nge a inthup?

Chief minister Lal Thanhawla chuan Anti Corruption Bureau (ACB) pisa thar hawnnaah thu sawiin Mizoram chu eiruk loh leh eiruk dona (anti corruption) lamah a ṭhang chak hle niin a sawi a; sorkarna an chan hnuah an intiam angin ACB an tihlen thu a sawi bawk.

Tun hnaiah sorkarin ACB a tilian a, ACB-a thawk­tute pawh training ṭha zawk a pe a, thubuai nei tharte pawh an awm a, hmasawnna duh­awm tak chu a ni ngei mai. Tun hmain eiru hrem thawm hriat a ni lo a, eiruk thubuai pawh sawi rik a khât hle a, eirute pawh an inthup lem lo a, an eiruk pawh an zahpui lo ang hialin a lang.

Tun hnaiah mipui thikthu a chhe tawlh tawlh a, eiruk huatna a zual zel a, mipuiin ngaihdan puan chhuahna leh thil dik lo nia an hriatte puanzarna (media) an nei ṭha chho zel bawk a, eiruk duh lohna tlangaupui hriat tur a tam ta. Sorkar pawhin a tih tur tiin eiruk dona thawm a tiri ve reng bawk a, hei hi hmasawnna ṭha tak chu a ni ngei mai a; nimahsela a takah eiruk hi a tlem sawt nge, eirute hi an inthup ta zawk, tih hi ngaihtuah tham a ni.

Mizoram budget kan hre vek a, kan rama mipui awm zat pawh kan hre tlang a, chuti chunga hmasawnna kai rual lo leh retheite retheihna belhchhah a nih dan en hi chuan, Mizoram sor­kar pawisa hi a hman­na tur dik loa a kal nasa hle tih thup rual a ni lo. Sorkar laipui aṭanga sum lo kal hi dik taka hman chu ni ngat se, tun ang hian sorkar hnathawk hausa hi an tam lo ang a, project puitling lo leh ṭha lo hi a tlem sawt ang a, contractor leh supplier hausa chak lutuk pawh hi an bo ngei tur a ni.

A thu leh thâwma eiruk kan do dan chen hian a takin bawhzui ngat ila, Mizoramah hian eiruk hi tun ang hian a hluar lo ang. Eiruk dona lama kan ṭhanharh dan hian a takin eiruk tibo se, chumi ram thleng tur chuan sorkar hian tun aia na zawk leh huaisen zawka eiruk hi a do tak tak a ngai a ni.