Sorkar thupek zawm hi himna a ni

Kum 2024-a ni hnuhnung ber kan thleng ta reng mai, a lawmawm hle. Naktuk mai hi kum thar, 2025 a ni dawn ta. Zanin hi kum hlui thlah zan leh kum thar lawm zan a ni.

Kum dangah chuan sorkarin a khap chungin kum hlui thlahna leh kum thar lawmna atan nasa takin halpuah hâl a ni tawh thin. Kuminah pawh sorkarin halpuah leh a kaihhnawih thilte a khap leh bawk. Sorkar hi mipui siam, mipui ta, mipui tana awm, mipui thatna tura kal thin a ni a; halpuah a khap pawh hi ram leh mipui tana tha zawk tur a nih avangin zâwm vek thei ila a duhawm.

Halpuah leh a kaihhnawih thilte hi thatna neih hauh lo, that lohna chi hrang hrang nei zawk a ni a; thil tha lo na nâ nã chu tih loh a tha ber. Halpuah hâl vanga hlim, lâwm leh nuam ti ta viau leh halpuah hâl loh vanga lunghnúr kan awm emaw a nih chuan kan inenfiah a ngai àwm e. Kan rilru puthmang leh sûkthlêk siamthat a ngai tihna a ni thei ang.

Kum thar lawmna atana halpuah hâl chak leh halpuah hâl hmu chak mi eng emaw zat an awm niin a lang. Hetiang rilru púte hian halpuah that lohna hrang hrang mithiam zawkte'n an sawi te, mihringte leh rante hriselna tichhetu, damlote tana harsatna belhchhahtu, mite tana harsatna siamtu a nihnate hi thinlung takin pawm thei se a duhawm hle.

'Tihdam aiin inven a tha zawk' tih hi thu dik kumkhua a ni. Thil reng reng hi venhim leh humhalh hun tha ber chu 'tun' a ni a; a chhiat tawh hnua humhalh leh siamthat tum ai chuan, a chhiat hma, a that lai ngeiin a chhiat lohna tura venhim leh humhalh a tha zawk.

Kan ram boruak, kan khawpui boruak humhalh a, a chhiatna laka venhim hun tha ber pawh 'tun' hi a ni a, boruak tichhe thei halpuah leh a kaihhnawih thilte hmanga tihchhiat kan phal tur a ni lo. Khua leh tui tha, Mizoram hmangaihtu chuan kan ram chhunga thil engkim hi a tichhe thei zawngin thil a ti tur a ni lo a, tichhe thei zawnga chê leh thil tite lakah humhim a tum zawk tur a ni.

Sorkarin halpuah/halmawi leh a kaihhnawihte a khap a, sorkar thu zawm mai hi a tha a, a him a, chhiatna leh lungngaihna laka invenna tha a ni. Mizo zawng zawng telna YMA leh kohhrante'n hâl lo turin min ngen bawk a, a zahawm hle; YMA leh kohhran ngenna hi zawm vek thei ila a duhawm.

Sorkar hmalakna leh dan leh thupekte hi ram danpui kalh emaw, mihring mihrinna nèkchêpna emaw, ram leh hnam leh mipui tana tha lo a nih si loh a, kan ngaitheilo a nih chuan keimahni kan inenfiah a, kan insiamthat tihna a ni. Sorkar thupek zawm hi himna leh hlimna a ni tih i hria ang u.