Pawl din chamah sorkar chawlh

June 15 hi Young Mizo Asso­ciation din cham a ni a, he YMA Day-ah hian sorkarin pisa leh zirna in chawlh a puang ṭhin. YMA Day hi hmun tam takah chuan awm ni khama hman ṭhin a ni a, hmun ṭhenkhatah erawh an lawm lem lo.

Mizoram sorkar hian kar khatah hnathawh loh ni vawi hnih a nei ziah a, Inrinni leh Pathianniah a chawl ṭhin. Hei bakah hian chawlh (holiday) a nei nual bawk a, sakhaw hrang hrang ni pawimawh, sorkar ni pawimawh bikte leh mi pawimawhte pianchamah chawlh a puang a, pawl ṭhen­khat din chamah chawlh a puang bawk ṭhin.

YMA Day-a chawlh hman hi thil inhmeh tak a ni reng ṭhin a, kan hman ṭhin dante nen pawh a inhmeh hle. Khaw/ veng tam tak chuan ni lengin hun an hmang a, tlaiah ruaite ṭhehin khawtlang mipuiin kum khata an ni nghahhlelh ber pawl a ni. Khawsak phung a inthlak hret hret a, khawpuia veng tam zawk hi chuan YMA Day-ah meuh pawh nileng programme hi an huaihawt ta mang lo a, thingtlang lamah pawh awmni khama hun hmang lo an pung zel.

Zêp thu a chêng lo a, Mizoram pumah YMA Day hi hman niin sawi mah ila, YMA din ve lohna hmunahte chuan YMA Day hian awmzia a nei tam lo a, sorkar hnathawh chawlh ni a ni ve mai. YMA member ni lem lo, naupang leh a bikin hmeichhe ṭhenkhat tan pawh YMA Day hi chawlh satliah ang maia hman awlsam tak a ni. YMA Day hi sorkarin chawlh a puang a nih rau rau chuan, tun aia ṭangkai zawk leh chawlh puan a nih chhan ang taka YMA-in thil ṭha tih ni-ah tun aia uara hmang turin inzirtir thar leh ni se a ṭha hle.

MHIP Day-a a ram pum kan chawl ṭhuap maite hi a inhmeh lo a, hmeichhia zawng zawng pawh MHIP member an ni tawh lo a, mipate leh zirlaite nena kan chawl rual ṭhup mai ṭhin hi chu ennawn ngam a ṭha. YMA Day pawh hi chawlh puan a nih ang ngei hian vantlang huap programme, thil ṭha tih ni leh thil ṭangkai atan hmang uar deuh deuh thei ila a duhawm hle a ni.