Mizoram mipui tan kum tha ni se

Kum 2025 kan chuang kai leh ta a, a lawmawm. Tun hun thleng pha loa mual liam ta mi tam tak an awm a, chutih laia keini, tuna mite'n kum thar kan thleng hi a lawmawm tak zet a, Pathian enkawlna leh hruaina kan chan hi ropui a hle.

Kum a thar hian ngaihtuahna thar leh ruahmanna thar neih lem loh pawhin phûrna eng emaw tak hi a awm ve hrim hrim mai a; hei hi a tha zawng leh hmasawnna atan hman thiam a pawimawh hle.

Mi tin mai hi kan nihna leh hnathawh a inang lo. Lo leh huan neia hna thawk leh kuthnathawh dang khawih te, sumdawng te, kutkawih eizawnna lama kal te, sorkar leh private firm-a thawkte kan ni hlawm. Mahni hna theuhah hmasawn kan tum tur a ni a, kum 2025-ah pawh hian eng kawngah emaw tal hmasawn kan tum tur a ni.

Mi thenkhat chuan tun kum tharah hian thil tum leh hmachhawp mumal tak neiin, ruahmanna pawh thui tak kan neiin a rinawm. Kan thil tum, hmachhawp leh ruahmannate chu kan hlawhtlin theih nan rinawmna, taimakna, tumruhna nen theihtawp chhuaha bei tur leh, kan hlawhtlin nghal mai loh pawha beidawng loa bei sel turin mi tin duhsakna kan hlan a; kum 2025 hi Mizote leh Mizoram mipui tan kum tha, hlawhtlinna sang zawk kan chan kum lo ni ngei rawh se.