Hna thawk turin insanmar a hun e

Kum 2024 Krismas leh kum thar 2025 lawmna hun a zo thawkhat a; heng hun lawmna buatsaihtu kohhran zawng zawngin hun an ruatte an zo thawkhat tawh. Chutihrualin, kum thar lawmna ruai vawiin lama la theh (nawn) an awm mai thei a, mahse, mi tlemte an ni tawh ang.

Mizote hunpui ber berte lawmna a zawh thawkhat tawh avangin hunpui rilru - mahni hna lam ngaihtuah mang loa awm hun a tâwp a ni ber tawh a, chuvang chuan, hunpui rilru dahthain, mahni hna theuh thawk tan tawh tura rilru put a hun ta.

Vawiin hi kumina sorkar pisa kai tan ní a ni a, mahse, restricted holiday a nih avangin kalphung pangngaiin an la kal theih meuh lo mai thei. Mimal hnuaia thawk te, mahni hna thawkte tan pawh vawiin hi hna thawh tan hun angin a sawi theih awm e.

Kum 2025 hi Mizoram mipui tan kum tha, malsawmna dawn kum ni tur chuan mi tinin hna kan thawh tam a ngai. Sum hi ni tin khawsakna atana pawimawh ber pakhat a ni. Sum leh phai hi amahin a rawn kal ngawt lo a, thawh chhuah tur a ni a; hna thawh loh chuan sum leh pai neih ngawt theih a ni lo; hlemhlêtna, eirûkna leh rûkrûk atanga neih a nih ngawt loh chuan.

He kum thar, 2025 hi kan tan kum tha leh kum malsáwm a nih theih nan taima tak leh rim taka thawh a ngai a, chutiang tur chuan kum bul atanga bul tan that a pawimawh. Hunpui vuakvêt hi hna thawk tura min tizuaia min vaw chautu ni lo se, phûr taka mahni hna theuh thawk turin insanmar a hun e.