Dik loh hreh lohna

Mizoram Scholarship Board (MSB) hotute chuan, scholarship chu a dil tur dik takte'n an dil theih nan 'income certficate' dik taka pe chhuak turin district tina DC-te hnenah ngenna thlen an tum.

Mizorama tribal zirlaite hian scholarship an dil thei a; nimahsela chhungkaw sum lakluh tam lamah a bituk chin a awm a, chumi tichiang tur chuan income certificate phût tel a ni. Tuna an kalpui danah hi chuan income certificate rinhlelhawm tak tak a awm ṭhin a, scholarship dawn theihna tura income certificate dik lo siamtir hreh lo zirlai an awm niin a lang a, a pawi hle a ni.

Midangte kuta sahrang hmu lian a, midangte eiruk leh duhâmna sawisel fotu ṭhenkhatte hi, an kuta eiruk tur a awm remchan loh vang maia rinawm nia langte pawh an awm thei. Kan zirlai, Mizoram hmalam hun nia kan ngaihte zingah pawh scholarship dawn duh avanga dawt sawi hreh lo eng emaw zat an awm ziah a, tihdik loh hreh lohna rilru an pu tlat mai hi a pawi hle a ni.

Scholarship dilnaah hi chuan dik loh hi pawi loa ngaihna lian tak a awm ṭhin a, hei hi insiam ṭhat kan ngaihna lai chu a nih hmel. Dik lo chu dik lo ni mai se, mahni chhungkaw sum lakluh dik lo puia ziah luih tlat mai hi a fel lo hle a ni. Thil pawi tak chu zirlai nawlpuiah hian scholarship dawn theihna tur a nih chuan income certificate fel tawk lo siam hreh lo an tam hi a ni a, he ngaihdan hi kal pêl thei tawh ila a duhawm khawp mai.

Hetihlai hian Mizo ṭhalai zingah dikna chawisan duh, an sum lakluh an hriat chian avanga scholarship pawh dil lo ngam ṭhahnem tak an awm a, a lawmawm hle. Pawisa dawn theihna ni dawn mah se, dikna ṭan tlata ṭhiante pawisa dawn ang dawn ve loh pawh pawi ti lo Mizo ṭhalai an pung zel hi hmasawnna lawmawm tak a ni.

Mizoram insiamṭhat ṭulna chu mipui nawlpuiah hian 'dik loh hreh lohna' a lut thuk ta lutuk hi a ni a; politician leh sorkar hnathawk eiru nia kan hriatte kan dema kan sawisellai hian, mipui lamah pawh hian kan tana hlawkna tur awm dek dekah chuan dik zan loa kal mai hreh lo tam tak kan awm a, hei hi a pawi hle a ni. Mahni tana hlawk turah chuan dik loa tih pawh hreh lo hnam anga kan lan hma hian, mahni zawn ṭheuhah hian dik taka kal tumin rilru i siam thar ang u.