GST atan inbuatsaih a ngai e

India ram puma chhiah lâkna dan thar duan, Goods & Services Tax Bill chu Rajya Sabha leh Lok Sabha-te chuan an pass ta a, GST hi hman a nih hunah The Mizoram Entry Tax leh value added tax (VAT) tihtawp a ni dawn a; kum khata Rs. 5,00,000 aia tam la lutte'n Service Tax an chawi a ngai tawh dawn.

Mizorama thil buaithlak tak mai chu chhiah lak leh pek dan hi a ni a, tuna kan hman mek VAT leh Entry Tax lak danah pawh hian thil fel tawk lo leh fuh tawk lo tam tak a awm. Zêp thu a cheng lo a, Taxation department-a hnathawktu zingah ngei pawh tuna an chhiah lak dan kalphung hre mumal lo an awm a, hei vang hian hnathawh pawh a harsat phah hle a ni.

Tunah chuan chhiah lak dan thar hlak duan a ni a, GST hi nakkum kum laihawl velah chuan hman a ni tawh mai dawn niin a lang. GST hian nghawng lian tak a nei dawn a, kan chhiah lak leh pek dan hi a thlak hlawk dawn niin a lang a, inzir belh tur tam tak a awm ang.

Mipui nawlpui tan phei chuan he chhiah kalphung thar hi eng nge a nih a, eng chiah nge a nghawng dawn hriatthiam a la harsa a; sorkar laipuiin ram pum huapa ṭha zawk tura a ngaih a nih vangin ram tana
ṭha tur a nih ngei chu a rinawm. Hetihlai hian hetianga thil lian tham inthlak-thlengah hian a hre lo leh thiam lo pawl nih chuan midangte ban phak loa awm reng theih a ni a, sorkar mi leh sa an inbuatsaih a ṭul dawn.

Mipuite hi chuan ruahmanna fel a awm chuan ṭha takin an zawm leh maiin a rinawm a, a pawimawh hmasa chu chhiah thar buaipuitu lam hi an inzira an inbuatsaih a ngai a. A taka GST kalpui a nih huna bel leh thiam taka an buaipui theihna turin tun aṭangin Taxation department leh he lam khawihtute an inzir ṭan a ngai a ni.