Thlai hralh/leiah theihtawp chhuah a ṭul

Agriculture & Farmers Welfare Minister chuan February 20, 2025 aṭangin Mizoram sorkarin Mizorama sawhthing tharte kg.-ah Rs 50-a a lei ṭan dawn thu January 7, 2025 khan a puang a; sawhthing leh dan tur kalhmangte thuthat thehdarhtute hnenah a tarlang. Sorkarin sawhthing lei dan turah ruahmanna kimchang zawk siama a puangzar ta hi a lawmawm.

Mizoramah sawhthing a thar ṭan tawh a, nikum tawp lam khan mi ṭhenkhat chuan an cho ṭan tawh a, chawh hun vanglai ang erawh a la thleng lo deuh. Tunah hian mi tam takin an cho ṭan tawh a, la cho ṭan lo pawh tam tak an awm ang.

Mizo thlai chi li lei hi ZPM party policy lian ber pakhat a ni a, inthlan hma aṭanga an inzawrhna, kut hnathawktu tam takin rorel tura ZPM an thlan chhan a ni. Chuvangin, thlai chi lite hi sorkarin rate a bituk aia tlâwm loa kut hnathawktute'n an hralh ngei theih nan sorkar hian hma a la tur a ni a, chhuanlam a awm thiang lo. An intiam ang taka thlai hralh a nih theih nan engti theihtawp an chhuah tur a ni.

Thil ruahman hi chu a theih mai a, a taka tihhlawhtlin hi a harsa lai a ni fo. Thlai hralh leh lei chungchangah pawh ruahman dan leh tum dan ang diak diakin thil a kal vek lo mai thei a, harsatna eng eng emaw la thleng palh thei a ni.

Thlai thar hralh leh leiah thil kal tluang lo leh harsatna a awm a nih pawhin, sorkarin a chinfel dan kawng a zawng zung zung tur a ni. Mipui leh eptu party-te pawhin sorkar dem nghal ringawt zel lo a, an hriatthiam a ṭulna laite pawh a la awm àwm e.

Eptu party-te'n sorkarin an intiam ang taka kut hnathawktute thlai thar hralh/lei a nih theih nan hma la tura sorkar an phût thu an lo puangzar tawh ṭhin; sorkar an nawrna a ni a, an tih tur pawh a ni. An lo phût tawh anga sorkarin rate a bituk ang taka kut hnathawktute'n an thlai tharte an hralh thei a nih chuan eptu party-te pawhin lawmpui thei se a mawi hle ang.