Sorkar hnathawk hmun sawn

Mamita Joint Village Council, tlawmngai pawl hrang hrang leh damdawi dawr neitute chuan Mamit CMO hnuaia assistant director (Food & Drugs) chu thlaktu awm loa Serchhipa sawn a nih vanga lungawi lohna lantir nan Mamit a chhuahsan tur an dang a; a thlaktu tur sorkarin a dah hma chuan Mamit a chhuahsan theih loh nan hma an la dawn niin an sawi.

Sorkar hnathawk transfer hian tun hnaiah nghawng a nei ta zauh zauh a, a bikin damdawi-in lama thawktute leh zirtirtu sawn hian khawtlangah nghawng a nei lian ṭhin. Tun hnaia Mamita thil thlengte pawh hi a chhuahsan tak hmun ruak hnawhkhattu an awm loh chuan mipui tawrhna thlen theitu tur niin a lang a, hei hi mipuiin an duh lo niin a lang.

Sorkar hnathawk chet vel dan hi chu sorkar kuta awm a ni a, sorkar thuneihna a ni. Sorkar hian a duh leh mamawhna hmunah a hnathawkte hi a dah thei a, tu pawh hi khawi hmunah pawh awm thei tur vek an ni. Hetihlai hian sorkar hian a hnathawkte a siksawi danah hian tu mimal emaw khua emaw ṭhatna tur bik ngaihtuah lo se a ṭha khawp mai.

Khaw tam takin an mamawh ang zirtirtu an neih loh avangin an lungawi loh thu an chhuah a, khawpuiah zirlai pawh nei mang loin zirtirtu an awm ṭhep ṭhuap a, hetiang thil chingfel thei lo sorkar hlir kan nei mai hi chu a ngaimawhawm tawh khawp mai. Tuna Mamita thil thlengte hi sorkar hian thil remchang zawk thlira ti a ni mai thei a; nimahsela sorkar lo chet tawh dan enin Mamit mipuite hian an khaw tana ṭha lo zawkin thil a kal dawn niin an hria a ni ngei ang a, an thil tih pawh hi dem lutuk tur niin a lang lo.

Engpawhnise Mizoram sorkar hian a hnathawkte hi mamawhtu tamna hmunah zel dah ṭhin se, nawr leh kherh peih deuhte avangin thutlukna siam mai lo se, mipui tana rawngbawltu sorkar hnathawkte mipui tana an ṭangkaina ber tura dah hi sorkar hian tum ṭhin rawh se.