Ruihhlo do

Mizoram police, excise leh Central YMA-te chuan a huhoin ruihhlo an do dawn a, an thawhhona an hawn ṭuma khuallian Home minister chuan, "Mi lian leh mite thliar loin dan bawhchhia chu dan hmangin an chungchang kan ngaihtuah zel dawn. Dan hnuaiah milian leh mite an awm lo. Zu leh ruihtheih thil avanga mi dang tana harsatna siamtute chungah sorkarin khauh takin thununna a lek dawn," a ti.

Ruihhlo do turin sorkar a inpuahchah a, a chakna neihin a tlin lo tih hriain CYMA nen an thawkho dawn a, sorkarin sum leh thil dangah a ṭanpui ang. Ruihhlo do hi thapui thawha beih a ngai a, tun anga kan kal zel chuan kan ram hmabak hi a thim hle niin a lang.

Hetihlai hian ruihhlo siamna hmanruaa an hman ber, Pseudoe-phedrine tawlh ruk danah Mizo-ramah ngaihdan phir lian tak a awm mek a, he 'khehpuam' tia an sawi maia inhnamhnawih hi man ngam loh an awm niin an sawi fo. Chiang taka an man te pawh chhuah an ni tho a, sum an neih miau avangin man an ni hleithei lo a, a ṭhente pawh an sum neih dan rinhlelhawm, kut man awm si lote an awm bawk. Ruihhlo do kan kalpui tak tak dawn a nih chuan, hengte pawh hi hlahthlem bik a remchang lo ang.

Tun hnaiah Myanmar lam
aṭangin ruihhlo a lo lut thla nasa a, Zokhawthar aṭanga maxi cab chhuakahte hian an phur
ṭhin niin CYMA chuan an sawi a, hengte hi an hre chiang a nih chuan ngun taka en ṭhin ni rawh se. Khawvel hmun dangah pawh ruihhloa sumdawng nia rinhlelhte chu rei tak tak an chelh ding fo a, ruihhlo phur nia rinhlelh lirtheite hi chu a dap chhung rei deuh mah se uluk taka dap ni ṭhin se, anni lam pawh an ṭi deuh ngei ang.

Tunah hi chuan ruihhlo tawlh duh tan Myanmar leh Assam lam aṭangin harsa lo takin a lakluh theih a, Manipur aṭanga lirthei lo kalte pawh hi uluk taka dap an ni ngai mang lo.

Mizorama ruihhlo lo luhna kawng hi tun aia khauh zawka vil ni se, Mizoram chhungah pawh sorkar leh YMA-te chakna inring tawnin ruihhlo vaiin ṭan la se, Mizoram aṭangin ruihhlo umbo tumin i ṭang tlang ang u.