Ruihhlo donaah ṭan tlan a ngai e

Excise & Narcotics Department chhinchhiah danin, nikum 2024 chhung khan Mizoramah ruihhlo vangin mi 67 an thi a, kum 2023-a thi zat 76 aiin pakuain a tlem. Kum 1984 aṭanga tun thlengin ruihhlo vangin Mizoramah mi 1,879 an thi tawha chhinchhiah a ni a, kumin 2025 bikah erawh thi an la awm lo.

Kum 2024 chhunga Mizorama ruihhlo vanga thi Excise & Narcotics-in an chhinchhiah mi 67-te chu mipa 58 leh hmeichhia pakua an ni a, kum 21 leh 57 inkar an ni. Mi 39 chu heroin ti ṭhin an ni a, mi 28-te chu ruihhlo dang tih pawlh ṭhinte an ni thung.

Ruihhlo vanga thi zat hi kum hmasa aiin tlahniam hret mah se, an la tam hle mai a; nasa zawka do a ṭulzia a lang. Ruihhloin a tihbuai mekte leh an chhungte an khawngaihthlak tak zet.

Tun hnaiah Mizoramah ruihhlo a hluarzia kan hria a, heroin (no. 4) a hluar zual. Ruihhloin kan ram a tihbuaizia leh ṭhalaite leh chhungkaw tam takin harsatna an tawh phah nasatzia te, thih phah an tam tawhziate ngaihventute chu an mangang a, ruihhlo donaah theihtawp chhuaha ṭan tlân a ṭulzia an aupui nasa tawh a ni.

Ruihhloin kan ram a tihbuaizia te, ṭhalai tam takin an thihpui dan te, chhungkaw tam tak mangan dante hi haider chi a ni lo. Mi tinin tih tak zeta kan ngaihven a, ruihhlo donaah kan tih theih tâwk ṭheuhah ṭan kan lâk a ṭul tak zet tawh.

Ruihhlo hian tunah kan chhungkua a la rawn luh chilh lo a nih pawhin, engtikah emaw chuan a la rawn luh chilh theih a ni tih kan pawm a ngai. Chhungkaw tin hi a luh chilh thei a ni tih hriain, ruihhlo dona leh ruihhlo ngaite chhan chhuah kawngah kan phâk tâwk ang zela kan thawh a ṭul a; mi tute emaw tih tur bika dah chi a ni tawh lo. Ṭanrual hi chakna a ni tih kan hria a, ṭanrualna hmanga tihtlema hneh chi a ni.