Ram ro tling tura thawh ni rawh se

Chief Minister hoa January 7, 2025-a State Level SASCI Committee ṭhutkhawmah SASCI hmanga hnathawh mek leh thawh tura thlante thlirho a ni a, hna thawh tura ruahmante tarlan a ni.

CM hian hna thawhte chu thawh zawh hun tura tihah zawh ngei tum tur a nih thu leh ennawn (revise) ngai awm lo se an duh thu a sawi a, "SASCI leh fund danga thawh tur kan thlan leh kut kan thlak ve tawh chin chu a ṭha tur a ni," a ti.

Ṭhutkhawma tarlan, SASCI 2023-24 hnuaia thawh mekte leh 2024-25 hnuaia thawh turte enin, thil pawimawh tak tak, ram leh mipui nawlpui tana ṭangkai tak tak tur a ni tih a lang. Ṭha taka thawh a nih a, tihpuitlin vek a nih chuan Mizoram leh mipui hmasawnna tham a tling.

Hun kal tawhah SASCI leh thil dang aṭanga hna thawhna tur sum lo kalte Mizoram mipui náwlpui mamawh tak tak ni lo leh mi náwlpui chhawr ṭangkai loh tur thil atan hman a tam deuha sawi a ni ṭhin.

Mipui náwlpui huap zo lo, mi ṭhenkhat chauh chhawr ṭangkai theih tura hmasawnna hna thawh hi a ṭha tho a, mahse, a chhawrtu an tlem miau chuan ram hmasawnna tak tak a thleng zo lo ṭhin. Hmasawnna hna thawh tur siam leh thlanah fimkhur a ṭul a, ram leh mipui náwlpui mamawh hmasa leh ram leh hnam hmasawnna tak tak thlen thei tur thlan a pawimawh.

Sorkarin SASCI hmanga hna thawh tur, hmasawnna ruhrel siam tur a ruahmante hi a ṭha thawkhatin a lang a, a lawmawm. Mipui náwlpui mamawh hmasa thlan fuh a pawimawh rualin, mipui hman tlak ngeia puitlin a pawimawh tak zet.

CM-in, "SASCI leh fund danga thawh tur kan thlan leh kut kan thlak ve tawh chin chu a ṭha tur a ni," a tih angin, mipui pawhin hna ṭha an duh. SASCI hnuaia hna thawh mekte leh la thawh leh zel turte hi a thawktute'n ram leh hnam tana ro tling ni tura ṭha taka an thawh a ngai a, hlâwk lutuk an tum ringawt tur a ni lo. Ṭha taka thawh a nih theih nan sorkara thuneitute'n an vil ṭhat a ṭul bawk.