Hmeichhe politician

Mizoram State Commission for Women (MSCW)-in 'Legal Awarness Seminar on Domestic Violence an Women in Politics' tih an buatsaih hmanpuinaa thusawitu Chief minister Lal Thanhawla chuan, state danga dan hmanga hauhsak (reservation) vang ni loa politics-a hlawhtling hmeichhe tam tak an awm chu awhawm a tih thu a sawi.

Mizoramah hun rei tak chhung chu hmeichhe MLA an awm lo a, tunah hian hmeichhe MLA pakhat a awm mek a, ani hi by-election-a thlan tlin a ni. Aizawl Municipal Council hnuaiah seat hauhsaka tling hmeichhe councillor an awm a, VC leh Local Council in­thlanah hmeichhe seat hauhaa thlan tlin eng emaw zat an awm bawk.

Mizote hi mipa thununna hnuaia awm chu ni teh meuh mah ila, kan eizawnna leh kan chhungkuaah hian hmeichhiate hian hmun pawimawh tak an luah a, eizawnna kawngah phei chuan mipa tam takte tluk loh hmeichhia ṭhahnem tak an awm. Thiamna leh theihna lamah pawh hmeichhe ṭha tak tak an awm a; nimahsela khawtlang ro inrelna pawl hrang hrang leh kohhrante thleng pawhin hmeichhe hruaitu ṭha tak hi chu an vang pharh a ni.

Hei hi kan Mizo khawtlang inkaihhruai danah hmeichhiate hi roreltu ni lo tura kan ngaih vangte pawh a ni thei a, hmeichhe hnuaia kûn chu mipa tan a thiang lo anga ngai an la tam vang a ni thei a, a hmeichhe lamin an zir loh vangte pawh a ni ve thei bawk. State ṭhen­khatah chuan MLA chu sawi loh chief minister-ah pawh hmeichhia an nei a, India president leh prime minister bakah rorelna in sanga speaker-ah pawh hmeichhia an awm tawh ṭhin a, Mizorama hmeichhe ram hruaitu kan thlang tling hleithei lo hi chu chhût tham a ni.

Hei vang hian hmeichhia thlan tlin ngawr ngawr tum chu a ṭha kher lo ang a, mipate aia thlan turah kan la ngai lo a nih chuan hmeichhia inbarh luih tum pawh a ṭul lo ang. Hetihlai hian khawvel ke pen ruala pen ve kan tum a nih chuan, kan hmeichhiate zawk hian ṭan la thar se, mipate pawhin ram hruaitua an thlan duh tur khawpin ṭan la se; hmeichhe ram hruaitu ṭha zawk kan neih belh zel theihna tur hian mipa lam tih tur aiin hmeichhe lam tih tur hi a tam zawk mai awm mang e.