Missionary Day leh inpumkhatna

January 11 kha Mizorama missionary hmasa ber pahnih Sap Upa leh Pu Buanga ten Mizoram an thlen champha, Missionary Day a ni a, Mizoram Baptist Kohhrante chuan an lawm.

Missionary Day hi Baptist kohhrante chuan uar takin an lawm a, tualchhung kohhran tak takin ruai an ṭheh. Kohhran pawl dangte erawh chuan an lawm ve lo hlawm niin a lang. Mizoram Presbyterian Kohhran chuan an kohhran din ní-ah pawmin, an lawm ve bawk a, a lawmna atana ruaiṭheh sawi thâwm erawh hriart tur a awm meuh lo.

Mizoram Presbyterian Kohhranin Chanchin Ṭha Thlen Ni atan March 15, 1891 pawma a puala hun an hman hnuah Missionary Day a lo thlen hian inhnialna a tam ṭhin a, 'Inhnial ni' tia sawite pawh a lo awm tawh ṭhin.

Hetih lai hian, kumin 2025 January ni 11-ah erawh chuan social media hrang hrangah inhnialna thu leh hla a tlem deuh niin a lang. Hei hi kohhran inpumkhatna tura intèlkhawmna Council of Churches in Mizoram (CCM) a din tâk vâng nia rin dan a awm thei ang.

CCM hi October 27, 2024 khan din a ni a, Mizorama kohhran lian pahnih - Presbyterian Kohhran leh Baptist Kohhran bakah, kohhran dang paruk an tel. Kohhran inpumkhatna tura hma la zel tur pawl a ding hi a lawmawm. CCM din hnuah inhnialna ní anga mi tam takin an ngaih Missionary Day a lo thleng a, kum dang aiin inhnialna a tam ta lo deuh nia lang hi CCM-in rah ṭha a chhuah kan hmuh leh hriat theih hmasaah a ngaih theih àwm e.

Kumina Missionary Day-ah Aizawl, Lunglei leh hmun dang dangah Presbyterian kohhran leh Baptist kohhrante'n hun an hmangho hi a lawmawm a; kohhran pawl hrang hrangte inpumkhatna tura rahbi pawimawhte zinga mi a ni.

Kohhran páwla inrem lohna leh innghirnghona awm ṭhinte hi Mizoram mipuite'n hnâwl tial tial ila; Missionary Day pawh hun lo kal zel turah kohhran páwl hrang hrangte'n a remchan angin hmun tam zawkah hmanho zel theih ni se. Inhnialna atana hman ṭhin Missionary Day hi inlungrualna leh inpumkhatna atan hmang hlauh zawk thei ila, a duhawm ngawt mai.