Sangha chi supply

Fisheries department chuan tun hnaiah Serchhip ram chhung, Zawlpui leh a chhehvelah ṭum khata buh leh sangha thar chhuah theihna tur, Paddy-cum-Fish Culture an kalpui a, leileta sangha khawi tura thlan chhuah mi 80-te hnenah sangha chi an pe.

Sangha chi hian sawi a hlawh hle mai a, kan kalpui dan fuh tawk loh avangin sawi leh sel a tam hle. Kum 2015 khan Anti Corruption Bureau (ACB) chuan, NLUP hnuaia sangha chi supply dan chhui chiang turin thubuai an ziak lut tawh a; tun hnaiah Mizoram Fisheries Technical Service Association (MFTSA) chuan thuchhuah siamin, sangha chi reng reng supply order ang chiaha lian sem tawh tur leh, sangha chi dik tak a nih loh chuan sem tawh lo turin an member-te an hriattir a; Mizorama sangha khawitute hnena Fisheries department-in sangha a sem ṭhinah duhthusam loh thil a thleng fo ṭhin tih an hriat thu an sawi chhuak.

Sangha chi sem dan fel lo hi sawi rik a ni fo a, thil pawi tak a ni a, a tuartu chu sangha khawia eizawngte an ni. Chinchang inti hre deuh chuan pawisa siamna remchangah tuten emaw an hmang fo niin an sawi a, hei hi a tak a nih chuan a vanduaithlak takzet a ni.

Mizorama thil pawi tak mai chu sorkar aṭanga hamṭhatna awm thei tur hi sorkarin a buatsaih chhan mipuite hnen a thlen hmaa pelhe ṭhin hi a ni a, sangha chi supply an kalpui danah pawh hian tun hma aṭangin thil fuh lo a lo awm tawh ṭhin a, hei hi MFTSA thuchhuah hian a tichiang takzet a ni.

Tun hnaia Ser-chhip lama an sangha chi semte erawh hi chu sangha chi ṭha tak turah ngai ila, a thlawna sangha chi dawngtute pawhin sorkar duhsakna an dawn hi hlawhtlinpui tumin kalpui se, sangha chi sem ṭhin hi sangha khawitute'n a hlawkna an dawn theih ngeina turin kalpui rawh se.