Sorkar hnathawkte thununna

Home minister R Lalzirliana chuan, sorkar hnathawk zingah tlawmngai pawla thûk taka inhmang, sokar do zawnga hma la ṭhin an awm tih a sawi a, sorkar confidential file social media lama lo pût chhuak ṭhinte an ngaimawh thu a sawi a, hetiang tih chingte hi dan anga hrem theih an nih thu a sawi.

Home Minister thusawi hi tun hmaa sawi ngai lem lo, tun hnaiah erawh uar taka sawi ṭul ta a ni a, Mizoram sorkar hnathawkte che zia hi a inthlak thui tawh hle. Tun hma deuh chuan sorkar hnathawk hian sorkar pawi sawi an hlau a, sorkar kalh zawnga kal phei chu an ngam ngai lo a ni ber a; tunah erawh sorkar hnathawk an ni tih hriat chian, sorkar kalh zawnga kal ngam tam tak an awm tawh.

Hei hi sorkar office inrel­bawlna fuh loin a hrin chhuah niin a lang a, dan bawhchhia hrem ngam lo leh hrem nachang hre lo officer leh sorkar vang a ni ber. Sorkar hnathawkte inthununna a dul tial tial a, a hun takah office an kai thei meuh lo a, total bandh leh tute emaw nawrh huaihawtah pisa kai tumna rilru pu pawh an awm eih tawh lo a, tunah phei chuan sorkar dodaltu pawlah pawh langsar takin an inhmang ngam ta.

Tun hma chuan an ngaihdan ni loah pawh sorkar an hlauh vangin sorkar hnathawk chu a in­thiarfihlim a, tunlaia vantlang hriata confidential file an lo tipûtru ngamte nen hi chuan a inthlau hle. Heng zawng zawngah hian orkar hnathawkte hi an thiam lo chiang hle a; nimahsela a enkawltu lam pawh hian mawh an phur thui hle a ni.

Sorkar hnathawk sorkar kalh zawnga NGO-a inhmangte pawh hrem theih an nih chuan hrem mai se, confidential file lo tipûttu an awm pawhin zawn chhuaha hrem ni mai se, hetiang thil hi a tlem phah deuh ang. Sorkar hian a hnathawkte hi a thunun ngam tur a ni a, chuti lo chu tun aia harsatna lian zawk hi a la thleng zel thei a ni.