Sorkar leh sum siamna

Mizoram Legislative Assem-bly-a Estimates Committee member-te chuan Dihmunzawla PHE tui pump-na leh an hna-thawhte an enfiah a, PHE building hlui pakhat cheng nuai 63-a ṭhiah a ni chu to uchuak hlea an hriat thu an sawi.

Mizoramah hian sorkar hi mi tam takin sum siamna ang maiin an ngai a, mahni hnathawh phu loa hausa pawh tam tak an awm tawh reng a ni. Sorkar hi a nêk thiam apiangin an nêk a, sum awmna hre fuh deuh chuan hausak nan tak an hmang ṭhin a, a pawi hle.

Tun hnaia Esti-mates Committee member-ten Di-hmunzawla PHE tui pump-na hmun an tlawh a, cheng nuai 63 senga in ṭhiah an hmu chhuak hi a zialo ngawt mai. He thil hi MLA rualte hian hmu chhuak ta lo se, mipui hriat lohin a awm reng dawn tihna a ni a, a hmuna kalte sawi hmangin tute emaw sum siamna a nih mai hmel a, a pawi khawp mai.

He in ṭhiah hna hi tu thawh pawh lo ni se, a viltu an awm ngei tur a ni a, department aiawha a viltu hi a mawhphurtu a ni lo thei lo. Tute hnathawh nge ni a, tute inthurual thil kalpui nge a nih lam chu mipuiin hre ve vek lo mah ila, sorkar hnuaia hnathawh a nih miau avangin a viltu hian a tih tur a ti tawk lo tihna a ni.

Heti lo zawnga kan thlir chuan, viltu awm reng chunga heti zat sum an seng a nih chuan, a viltu lam hi an rinhlelhawm nghal lo thei lo a, PHE department lamin hei hi an ngawih bopui thiang lo. Tun hnaiah PHE-in hma a sawnin an thil tih ṭhenkhatte fakawm viau mah se, he in ṭhiahnaa cheng nuai 63 an hman dan hi a kimchangin an sawifiah thei tur a ni.

Sorkar sum a nih tawh chuan tumah hian an ren lo emaw tih mai tur a ni a, sum enkawltu leh a hnuaia hnathawkte hlei hlei hian sorkar sum hi an ren lo lehzual a ang. Tun hnaia MLA rualte hmuh chhuah PHE building hlui pakhat cheng nuai 63-a ṭhiah hi a changtu minister hoin chhui zui se, mipui hnenah thil awm dan puang ngei rawh se.