Mizote leh lehkha chhiar

Mizoram State Library-ah hian kumin July thla tawp thleng khan member 5,896 an awm a, lehkhabu 60,056 an nei. State Library-a thawktute chuan an awmna hmun a fianrial deuh tak avang leh, ṭhangtharin lehkha chhiar an taimak loh avangin lehkhabu hawhtu an tlahniam niin an sawi.

Lehkhabu chhiar-tu tlahniam hi Mizoramah chauh a ni lo a, hmun dangah pawh a thleng tho a; nimahsela tunlaia Mizo ṭhalai zingah hian lehkha chhiar taima tak hi an tlem hle a, a pawi khawp mai. Khawvel hmasawn zelin hmuhnawm thar a pe zel a, TV a hmuhnawm tawlh tawlh a, computer thiltihtheihna a pung zel a, phone leh thil dang hmangin chhiar tur tam tak a awm tawh bawk a, hengte hi lehkha chhiar ṭhin an tlakhniam chhan lian tak a tling ang.

Lehkha chhiar taima hnam tia sawi theih tur khawpin tun hmain Mizote hian lehkha kan chhiar nasa a, kan ban phaka awm lehkhabute kan chhiar nasa a, TV leh thil dang a la awm loh vang pawh a ni thei. Kristian sakhua kan nih hnuah Bible chhiar thiam a ṭulzia kan hria a, Zosap lamin ziak leh chhiar thiam turin ṭan an la bawk nen, kan lehkhabu hmuh ang ang kan chhiar taima ṭhin.

Tun hnaiah erawh a danglam zo ta a, chhan hrang hrang avangin Mizote'n lehkha kan chhiar tlem ta. Lehkha kan chhiar tlem piah lamah TV kan en nasa a, kan titi leh kan thusawite chu TV-a chhuak ṭhinin thui tak a kaihruai a, TV kaltlangin kan inkawm a ti ta deuh ber mai.

Tun ang zela kan kal chuan nakin lawkah chuan ṭhang-thar zingah hian thil hre ziktluak tak tak si lo, hre ve nial nual si tam tak an chhuak dawn niin a lang a, chutiang mi chu tunah pawh tam tak an awm ta. Lehkhabua chhiar tluka hriatna tipung theitu hi a la awm tak tak lo a, TV leh hmanraw danga kan hmuh leh kan chhiarte hi chuan hriatna tluantling min pe tawk lo a, lehkhabu chhiar hi kan uar deuh deuh a ngai.

Sorkarin sum tam tak sengin library a din a, a hmang ṭangkaitu an ṭhahnem tawk lo hi a pawi khawp mai. Ṭhangthar zawkte hian lehkhabu chhiar hi uar thar deuh deuh ila, finna leh hriatna tak tak awmna a ni tih hre chiang ila, lehkhabuah hian i kir leh ang u.