NIT harsatna chak zawka bawhzui ni se

National Institute of Technology (NIT), Mizoram-in January 14, 2025-a Convocation an hmannaah Chief Minister chuan, Lengpui rama NIT-Mizoram campus buaipui meka forest clearance chungchanga harsatna hun rei tak awm tawh chu sorkarin a ûm zui zel thu a sawi.

NIT-Mizoram campus forest clearance harsatna chungchangah hian CM chuan, "Sorkar laipuiah ziakin kan thlen a, hmaichhanah kan sawipui a, kan dilnate ngaithlain, hman ní deuh khan Forest Advisory Committee an lo kal," tiin a sawi a ni.

Lengpui rama NIT-Mizoram permanent campus din tur hian kum 2012 khan sorkar laipuia a changtu Minister-in lungphùm a phúm tawh a, mahse, kum sawm chuang a ral hnuah pawh tihpuitlin a la ni lo.

NIT-Mizoram campus-ah hian kutthlak ṭan ni tawh mah se, hna tam thawh a nih hmain forest clearance awm loh vangin hna a sukuk a, hun rei tak chu hna chhunzawm theih lohin a awm tawh.

Zirna kalpui reng tho ni mah se, Mizoram NIT hi mimal in luahin an la kual vel mai mai a, hei vang hian zirna pawhin a tuar ngeiin a rinawm. Zirnain a tuar a ni tih rin theih turin NIT dangah zirlai lut duh an tam em em laiin, NIT-Mizoramah chuan seat hnawhkhat loh a awm ṭhina sawi a ni.

NIT hi India rama zirna-in ṭha bik 'premier institution' an tih zinga mi a ni. Zirna-in ṭha Mizoramin a neih, ram leh hnam hmingṭhatna ni thei tur hun rei tak a sukuk ta hi a zialo tak zet a, Mizoram leh hnam ang pawha mualphona a tling thei âwm e.

Chief Minister-in a sawi angin, NIT-Mizoram campus a puitlin vat theih nan Mizoram sorkar hi theihtawp chhuahin ṭang lehzual rawh se. Mutmawh hnàrmawhah neiin, sorkar laipuia hmalak ngaiah bawhzui vat vat teh se.

Mizoram sorkara department ṭhenkhat inkarah pawh tih theih leh chinfel theih a awm a nih chuan inhriatthiamna nen bawhzui vat vat a ngai a ni.