Bank leh a dawrtu

Mizorama United Bank of India (UBI) branch pathumna, Mission Venga mi hawngtu Finance minister Lalsawta chuan, loan rûl ṭha lote'n mi hlawhtlinna tur an dâl thei tih a sawi a; bank-te chu a dawrtu mipui tan ṭanpuitu leh tiawlsamtu a ni tur a ni a, tiin a sawi bawk.

Tun hnaiah Ai­zawla bank pakhat chu zirlai pawl lamin tihluihnain an khartir a, an inbiak fel hnuah an hawng leh zui. He bank an khartir chhan hi Mizo mipuite tan an ṭangkai duh loh vang niin an puh a, PMEGP leh student loan an pek ṭhat duh loh vang niin an sawi.

Bank-te hian mipui pawisa ṭhahnem tak an kawl a, mipuiin an dawr hian bank lam hi a hlawk zawk an ni a, mipuite tan an inhawng zau ve tur a ni. Mahni hlawkna lam chiah ngaihtuah a, a dawrtute hlawk lêt ve theihna tur loan leh hamṭhatna dang awm theite an pe ṭha duh lo a nih chuan a fel lo hle.

Hetihlai hian Mizo mipuite hi loan pek chakawm lo tak kan lo ni palh thei a, a bank lam chiah dem lo hian tun hma aṭanga tun hnu thlenga loan rûl ṭha duh lote pawh hi an demawm hle. Finance minister sawi ang hian, loan hmangin mi tam takin eizawnna bul an ṭan duhlaiin tun hmaa loan rûl duh lote hian midangte tan harsatna an siam a, mi hlawhtlinna tur an dâl thei a ni.

Mizorama bank awm zingah bank ṭhenkhat chu a hnathawktu dawr hrehawm leh harsa bik an awm thute sawi ṭhin a ni a, hengte pawh hian an sim a ṭha a, mipuite tana awm an ni tih an inhriat chian a ngai. Loan leh mipui hamṭhatna dang pe chhuak duh lo an awm a nih pawhin an demawm a, danin a phal ang chu an pe ve ngei tur a ni. Mipui lam kan inenfiah a ṭul hle bawk a, Bank hi pawisa pûkna mai ni loin rulh leh tur a ni tih kan hriat chian a ngai a; bank dawr duhtu midangte tana harsatna siamtu leh hlawhtlinna dâltu nih loh i tum tlang ang u.