Bank-te ṭang lehzual rawh se

Chief Minister chuan January 15, 2025-a Aizawla Special State Level Bankers' Committee ṭhutkhawmah Mizorama bank ṭhenkhatte a duhkhawp lohna a sawi chhuak a, ṭang turin a chah.

CM hian Mizorama bank zingah CD ratio 40% aia hniam eng emaw zat an awm thu leh bank ṭhenkhat chuan 20% pawh an phâk loh thu a sawi a, "Mizo mipuite zah lohna a tlingin ka hria," a tih hial bakah, sumdawnna atan chauha Mizoram hmangtu bank-te Mizoramin a mamawh loh thu a sawi hial a ni.

Chief Minister hian Mizorama bank ṭhenkhat hotute a zilh na hle mai a, bank ṭhenkhat hotute tan chuan thil zahthlak leh mualphothlak tak a ni thei âwm e.

Bank-te hian sum an dawn (deposit) rualin, advances (loan) an pe chhuak tur a ni. Thil hre zawkte sawi danin, India ramah chuan bank-te'n loan an pek chhuah zat tura bituk chu deposit an hmuh aṭangin 60% aia tlem lo a ni.

Credit deposit (CD) ratio bituk 60% hi regional bank-te leh nationalised bank ṭhenkhatte'n an tlin ṭhin laiin, commercial bank tam takin an tling ngai lo a, commercial bank ṭhenkhat CD ratio phei chu 20% pawh a tling lo.

Mizorama bank eng emaw zatin Mizoram mipui aṭangin deposit tam tak an hmuh laiin, loan an pe chhuak tlem hle tih a chiang a; bank ṭhenkhat phei chuan loan pek chhuah an tum lo hrim hrim niin a lang. Hei hi a zialo tak zet. CM sawi angin, Mizoram mipui zah lohnaah miin an lo ngai a nih pawhin a àwm hle. Hetih rual hian, CD ratio sang tak tak bank an awm nual a, a lawmawm.

CD ratio hniam lutuk bank ṭhenkhat hotute Chief Minister-in a khak hi a àwm viau. CM thusawi hi bank hotute'n Mizoram mipui aw-ah ngaiin inhmuhchhuah nan hmang rawh se. Mizorama an tih tur leh mawhphurhna an hlen lohzia leh, Mizoram mipui tan an luan chhuah lohzia inhriat chhuah nan leh inenfiah nan hmang ṭha hle ang.

Bank zawng zawng tan CD ratio 60% tlin reng a har mai thei, an tlin thei chiah lo a nih pawhin 50% tal tlin turin rilru siamin ṭan la rawh se.