State university din tur chungchang

Lunglei NGO Coordination Committee chuan Lungleiah state university din an duh a, dinna tur ram a awm tih pawh tun hnai khan Higher & Technical Education Minister hnenah ziakin an thlen nghe nghe.

Mithiamte sawi danin, National Education Policy angin state tinte chu kum 2035 ral hmain state university din tura beisei an ni a, college-te pawh state university hnuaiah awm tura tih a ni.

State university din a nih pawhin, zirlai ṭhahnem tak an awm a ngai nia sawi a ni. Tun dinhmunah Mizoram sorkarin sorkar college pali emaw sâwi khâwmin state university din turin ruahmanna a neia sawi a ni bawk.

Lungleia NGO-te beisei hi thil àwm tak a ni a, Aizawlah Mizoram University (central university) a awm bawk nen, chhim lam (Lunglei)-a state university din beisei leh sorkara thlen hi a àwm em em. Chutih rualin, tun dinhmunah Lungleiah hian state sorkar hnuaiah college (general) pahnih a awm a, NEP-in a duh dan leh state sorkarin a tum dan nen thil harsa a nih theihna lai a awm theiin a lang.

Lunglei lamah state university awm ta se, Mizoram tan ṭhatna tam tak a awm thei a; mipui leh zirlai, a bikin Mizoram chhim lama awmte tan a remchang hle ang.

Chutih rualin, Aizawl hi state capital a nih angin Mizoram hmun tin aṭanga pan khawm a ni a, district dang khawpuite ngaihtuahin a lian fál hle. Local council electoral roll thar berah pawh Aizawlah LC 87 leh voter 2,44,726 an awm laiin, a dawttu Lungleiah LC 24 leh voter 41,206 an awm a; LMC chhunga voter zat hi AMC-a voter zat aṭangin 14.41% chauh a ni. Chuvangin, state university din tur hi Aizawla a awm a ṭhat zawkna leh remchan zawkna a awm thei bawk àwm e.

Hun eng emaw ti kal ta aṭang khan Lunglei lamah MZU Southern Campus din tuma hmalak a ni a, a hmun turte pawh thlan a ni tawh. Hei hi tihpuitlin tum zel a nih chuan Lunglei lama state university din leh chu a ṭul rêng em tih pawh ngaihtuah theih a ni.

Engpawhnise, state university din chungchangah sorkar hotute'n rilru fím leh uluk taka an ngaihtuah a ngai a; mipui náwlpui pawhin Mizoram leh mipui, zirlaite tana ṭha tur kan lo ngaihven ve a, a remchan anga sorkar hotute kan finchhuah ve pawh a ṭha àwm e.