Motor zawng zawng intlan chhawk

Traffic Management Coor-dination Committee thutlukna angin September 1, 2016 aṭangin Aizawla taxi 3,526 awm mekte chu hlawm thuma ṭhenin an intlan chhawk dawn a; taxi-te chu hlawm thum - A, B leh C-ah ṭhen an ni ang a, ni tin hlawm khat zel an chawlh tur thu a sawi.

Aizawl khawpuia lirthei tlan hleithei lo hi huaisen taka a chinfel dan zawn a ngai a, thutlukna siam ngam hi chu a ṭul tawh takzet a ni. Tunah hi chuan lirtheia kal chuan kan kal tumna thlen theih hun tur hi teh theih a ni lo a, thil pawimawh leh
ṭulah pawh kan tlai fo a; hun, tha leh sum a heh hle.

Taxi-te an intlan chhawk chuan traffic jam hi thui tak chu chinfel a nih theih a rinawm a; nimahsela hei hian kan buaina tam zawk hi a la chhâwk zo dawn lo. Lirthei zawng zawng hi a inchhawka kan din hun siam mai hi a fel berin a lang a, he rawtna hi sawi lan pawh a ni zauh zauh tawh.

Vanglaini lamin rawtna kan tartan fo tawh ṭhin, lirthei registration number-te an tawpna ni zela tlan loh hi thil hrehawm leh harsa niin a lang lo. Engtirnan no. 1-a tawp chu calendar-a ni 1, 11, 21-ahte an tlan chhuak thei lo ang a, motor no. 2-a tawp chu ni 2, 12 leh 22-ahte an tlan chhuak thei lo ang - chutiang zelin number dangte pawh. Hetia tih hian a tam berah thla khatah ni li chiah kan ding ang a, traffic jam zualpui erawh a ziaawm ngei ang.

June 2016 thleng khan Aizawl district-ah ringawt lirthei 1,06,038 ziah luh a ni tawh a, heng zinga a tam ber hi Aizawla tlan an ni. Khawpui lian tak a ni lo a, a kawngpui huam chin phei chu a thui lo hle. Hei vang hian huaisen taka intlanchhawk rawt mai hi a hun tawh.

Intlanchhawk tura tih hian VIP, ambulance, police, damdawi-ina thawktute leh mi pawimawh bikte hi ngaihhnathiam ni se; a bak zawng chu private, sumdawnna leh sorkar lirthei pawh ni se thuawih takin mahni registration tawpna number ang ni a lo thlen apiangin indin chhawk mai ila, a nuam kan tiin kan zavaia hahdamna tur a ni ngei ang.