Meizial leh thil dang
Lungleia Legal Metrology, Police leh District Anti Tobacco Squad-te chuan, tun hnai khan Lunglei khawpuiah meizial zuar leh wholeseller-te'n dan an zawm leh zawm loh an enfiah a; sumdawng panga aṭangin contraband cigarette báwm (carton) 32 an man. Hemi hma hian sumdawng 39 hnen aṭangin cigarette báwm 386 an lo man tawh bawk a; an hmalakna avangin Lunglei khawpuiah dan phal loha zawrh meizial hmuh tur a váng tawh hle tih an tarlang.
Mizoram sorkar hnuaia mahni hna tlin leh thawk ṭha ber pawl chu meizial dotute hi an ni a, anni hian mei zuk phal lohna hmuna mei zu hi a khat tawkin an dap reng a, dan phal loha vaihlo leh a kaihhnawih lakluh a awm leh awm loh an dap reng a, an hnathawh ṭhat hi mipuiin an chhawr chho zel a ni.
Meizial dona kawnga Mizo-ram sorkarin heti khawpa ke a pen chak thei a nih chuan, thil dangah pawh ṭan la se awmze neiin hna a thawk thei ang tih a chiang. Thil hi a nawrtuin a zir a, hnathawktu lam an ṭan phawt chuan tun hmaa tih theih âwm loha kan ngaihte pawh kha a tih theih zel a, kan tum leh tum loah a innghat thui hle.
Mizoram sorkar hian contract hna vil lamahte hian ṭan la thar se, engineer-te leh hnathawktu dangte hian an hna hi tun aiin uluk se, a turtu lam awm ṭha bawk se kan ramin hma a sawn ang. Sorkar lirthei a nihna loa hman a tam leh tam lohte hi a takin dap ṭhin se, ramri kaltlangin dan loin ran leh thil dang lakluh a nih leh nih lohte dap ngam se, lirtheiin nasa taka a tawrh ṭhin petrol leh diesel pawlh dalte hi hmuh chhuah tumin a hmunah luh chhuah ngam se, sorkar hnathawkte'n a hunah an pisa an kai nge kai lo tihte mai pawh hi enfiah tak tak a ni lo ṭhin hi a pawi hle a ni.
Mizote'n kan zuk nasat em em meizial hi tunah chuan puipunnaah kan zu ta vak lo a, dan loa meizial lakluh pawh a tlem tawh hle. Hei hi hnathawktute thawh rah a ni a, a kalpuitu leh a buaipuitu lamin an zir a, 'political will' nena thil tih chuan awmzia a nei. Meizial khap lama ṭhahnem a ngaih chen tal hian he sorkar hi thil ṭha dang thawk tur hian ṭang ngam ngat se, Mizoram nuam zawkah kan cheng ngei ang.