Thisen pe tura ṭhalaite ngen thu

Association for Voluntary Blood Donation (AVBD) chuan tun hnai khan press release an siam a, tunlai hian blood bank hrang hrangah thisen pe an tlem avangin thisen pe turin mimal leh pawlte an ngen.

Mizoramah hian pawl hrang hrangin tlawmngaiin thisen an pe ṭhin a; kohhran ṭhalai pawl te, NSS te, YMA branch-te hi thisen pe tam zual an ni.

Krismas hma deuh aṭangin Mizorama zirna-inte an châwl a, kum thar lamah pawh January thla hun eng emaw ti chhung an la châwl a; hei vang hian an tan December leh January thlaah thisen pek a harsa deuh niin a lang.

Krismas leh kum thar vuakvetah kohhran ṭhalai pawlte leh YMA-te tan tih tur a tam avangin an buai em em a, January thla phei chu hruaitu inthlak hun leh insîksawi hun lai a nih avangin thisen pek lamah rilru an pe hman lo niin a lang bawk. Hengte avang hian AVBD pawhin December leh January thlaah thisen pek a tlakhniam thu an tarlang.

Tun January thlaah pawh blood bank hrang hrangte'n blood donation camp neihna tur an nei mang lo a, blood bank-ah thisen dah khawl sa lak mai tur a awm mang lo a, thisen mamawhte'n thisen petu tur an zawn a ngai ṭhina sawi a ni.

Mizote hi tlawmngai hnam kan ni a, tlawmngaihna avangin kawng hrang hrangin mite kan ṭanpui ṭhin. Thisen pek pawh hi tunlaiah chuan mite ṭanpui theihna langsar tak a ni a, kan tih mek a ni bawk a; sum leh pai sên vak ngai lo a ni. Thisen pek hi Mizo kan nihna leh kan Kristianna nen pawh a inhmeh em em.

Thisen petu an tam lai leh tlem lai pawhin thisen mamawh erawh a ngai reng a, thisen mamawhtu tam tak an awm reng. Hei hi hriain, a thlawna thisen pek kawnga hma latu pawlte'n an ngenna hi thisen pe ṭhin pawl hrang hrangte leh mimalte'n ngai pawimawh ila, thisen pek a tlâkhniam lai tak hian thisen dan kawng zawng thei ila a duhawm hle a ni.