Thlai lei turin hmalak nghal a ngai

Agriculture & Farmers Welfare Minister chuan January 20, 2025-a an party pisaa inkhawma thu a sawinaah, Mizoram sorkarin February 20, 2025 aṭangin sawhthing a lei dawn avangin sawhthing chingtute inbuatsaih turin a chah a, "Kan hun ruatah ah sawhthing kan lei ṭan ngei dawn," a ti.

Agriculture Minister hian Mizorama sorkar kal tawhte'n an flagship programme-te politics khelh nante an hmang ṭhin angin a sawi a, a dikna chen a awm mai thei. Anni (sorkar lai) erawh chuan an term tawp dawn lama politics khelh nan hman an tum ve loh thu a sawi bawk.

Political party-te hian policy leh programme bikah lian bik leh ngaih pawimawh bik an nei ṭhin a, Mizorama sorkar ding tawhte'n flagship programme an nei ṭhin a, tuna sorkar mek pawhin flagship programme - Bana Kaih (Handholding) policy an nei.

Flagship programme hi political party-te hian politics khelh nan, mipuia inzawrh nan an hmang ṭhin a, hman àwm tak pawh a ni a, thil dik lo emaw, mawi lo emaw a ni kher lo ang. A pawimawh zawk chu - sorkar flagship programme chu sorkarna chelhtu party-te'n an tihlawhtling em tih a ni.

Sorkar term khat hi kum 5 a ni a, kum 5 danah inthlan a nih avangin tlak leh nghal theih a ni. Flagship programme pawh kum 5 atana duan, kum 5 chhunga tihpuitlin tur a ni a; kum 5 hnu lam chu duan tel ngawt theih a ni lo.

Mizoram sorkar hian a flagship programme hi a tihpuitlin ngei a ngai a, thlai chi li lei tura an intiam phei hi chu an tihhlawhtlin vat a ngai a, tun aṭangin hmalak ṭan nghal a ṭul.

Kum kal tawhtea Mizorama sawhthing chawh leh hralh hun ngaihtuahin, kumina sawhthing lei ṭan hun tura tih February 20 pawh hi a tlai mah mah hial mai thei. February 20 aia hmaa sawhthing lei ṭan dan tur kawng zawn ni se a duhawm.