Sem a tawp mai dawn lo

Chief minister Lal Thanhawla chuan, Independence Day lawmna Lammuala tun hnaia a thusawiah an sorkar chhung chu NLUP an sem tur thu a sawi a; mipui rethei zawkte'n an mamawh miau avangin sum sem chu chawlhsan theih a nih loh thu a sawi.

Chief minister hian miretheite hmangaiin he thu hi a sawi niin a lang a, a mamawhtu lam an awm miau avangin pawisa sem hi chawlhsan theiah a inngai lo. Mizorama mirethei tamzia ngaih-tuah hian, pawisa mamawh hi chu an tam hle reng a, hengte hi kan sem vek seng a nih loh chuan pawisa sem kalpui reng hi ram tan a hrisel ber em, tih erawh chhut nawn fo a ṭul ang.

Tuna a lan dan chuan Mizo-ramah hian sorkarna chang thei political party pahnih chiah kan nei. Tuna sorkarna chelhtu Congress hian NLUP an kalpui a, a sum hrawm a nâ a, a thawm a lian a, hemi kawngah hi chuan tha pawh an thawh nasa hle. NLUP kaltlangin chhungkaw 1,30,000 hnenah ṭanpuina pek a ni tawh.

Ngun taka ngaihtuah ngai chu, chhungkaw 1,30,000 tehmeuh mai hnena NLUP ṭanpuina an sem hnu hian, Mizoram hmel hi a danglam em? A sem policy hi ṭha tak tak ni ta se, chhungkaw 1,30,000 hnena NLUP ṭanpuina sem hi chuan Mizoram economy hi a chawi sang dawrh theih tura beisei a ni a, NLUP sem hma leh sem hnu hian Mizoramah hmasawnna hmuh tur a awm em?

Tunah MNF lamin NLUP-a ṭanpuina aia sum hrawm lian zawk tur an duang ve leh mek a, anni lam pawhin a 'sem' hi mipuiin an lawm tih hriain an umzui ve niin a lang. Tuna a lan dan hi chuan, a eng party zawk pawh hi sorkar se, pawisa sem ngai loa inchawikan lam aiin a sema insem den den hi kan kal dan tur a la nih hmel.

Mizorama chhungkaw 1,30,000 zet hnena ṭanpuina sem a nih hnua kan dinhmun hetiang hi a ni a, heng pawisa zozaite hi a sema sem loin mirethei khai chhuahna policy lian tham dangah hmang ta ila, kan ramin a ṭhatpui zawk ang em?