Gas phur tihkhaihlak

Central YMA hnuaia Kum-puan duty-te'n gas phurtu truck-te'n gas an tihchingpen an man chhuah avangin gas phurtu driver-te an lungawi lo a, ni hnih chhung gas an phur duh lo. Mualkhang Gas Driver Association (MGDA) chuan Mualkhang Gas Bottling Plan manager hnenah lehkha ziakin, sorkara thuneitu ni lote'n kawng laka an challan leh gas bûr ruakte an lo laksak
ṭhin avangin tiamchin awm loa load an lak theih loh thu an ziak lang. CYMA lam chuan gas phurtu truck-te chu vengin an kal luihtir a ni.

He thil thleng hi a zahthlakin a huatthla la hle a, dan loa thil ti man chhuahte'n mipui tana harsatna siam luih tuma truck an dang hi a zialo hle a ni. He thil ngaihven hian FCSCA department leh CYMA hotute an ṭhukhawm tawh a, buaina hi chu an chingfel zui mai ang a; nimahsela he thil hi bawhzui ngei a ngai a ni.

Hun rei tak chhung chu Mizo-ramah eirawngbawlna gas buk tling loa hralh a ni ṭhin a, hei hian chhungkaw tam takah harsatna a thlen. Gas hman chhung a rei lo a, sum a hek bakah gas lak leh mai tur a awm loh avangin mipuiin an tuar nasa hle. Hetiang thil titute nia lang, truck driver-te'n Mizo mipuite harsatna thlentir hnial loa gas an phur duh lo leh gas phurtu truck dangte an dang hi chu mipui zah lohna lian tak a ni.

Hetiang hunah hian sorkar hi sorkar angin che ngam se, a ṭul angin huaisen takin thutlukna siam rawh se. Gas phur duh lotu truck-te license tihtawp saktheitu an ni a, driver-te driving license pawh titawp theitu an ni a; a state pum tana harsatna siam luitute hi chu dim tur an ni lo. FCSCA hotute'n Essential Commo-dities Act hmanga hrem theih an nih thu an sawi pawh a takin bawhzui se, hrem phute chu hram ngei se, khauh deuh taka kal a hun ta.

Gas phurh hi tihkhaihlak a nih tawh lohna turin sorkar hian a tih tur ti ngei rawh se, dan bawhchhetu hrem ngam sokar hi Mizoram hian a mamawh a, mipuiin an thlir reng dawn a ni.