Chhuh lêt thuai ni rawh se

General Administration Department (GAD) chuan January 20, 2025 kan office memorandum tichhuakin, sorkar officer châwl (pension) tawh, sorkar lirthei leh a khalhtu (driver) la kawlte chu sorkarah pe kîr thuai turin an hriattir. Hemi chungchang hi a ṭul anga bawhzui turin head of department-te a hriattir bawk.

Kum 2024 tir lam khan Mizoram sorkara department chhungah chuan officer pension tawh, sorkar/department lirthei leh thawktu la kawl zui rengte chu sorkarah kìr tura tih an ni. Pension tawhte pawhin thupek zâwmin, dan loa an thil kawlte chu sorkarah an kìr vek tawha sawi a ni a, a lawmawm.

Department pakhat huam china hmalakna kha department danga thawk ṭhin pension tawhte'n harh chhuahna atan an hmang lo niin a lang. Tunah GAD-in department zawng zawng huapin hriattirna a chhuah leh ta hial a; a zialo viau mai.

Pension hnu pawha sorkar lirthei leh a khalhtu la kawl zui zeltute hi GAD-in a tarlan dangin, thil dik lo, dan bawhchhiatna a ni a, a zialo tak zet. A a duhâmthlak a, zahthlak bawk. Kristian, Pathian ringtu tih àwm loh tak a ni.

Tute'n nge pension hnua sorkar lirthei la kawl zui zel tih hi mipui náwlpui chuan kan hre kher lo ang; mahse, an ṭhenawm khawvengte leh anmahni hre chiangtute chuan chuan an hre furin a rinawm. Dan loa thil tih a ni a, eirukna leh hlemhletna a ni a; mualphona a ni tihte hrethiam teh se.

Tuna sorkar lirthei leh a khalhtu la kawlte'n sorkar thuchhuak hi an zâwm ngei tur a ni a, a rang thei ang berin sorkara an pe kîr ngei tur a ni ang.

Pension tawh zinga sorkar lirthei leh driver la kawlte chu sorkar thuneitute pawhin an hre hlawmin a rinawm a, department-te pawhin an hre vekin a rinawm; chhuh let harsa a ni lo ang. GAD thuchhuak hi sorkarin chak takin ûm zui se, department hotute pawhin bawhzui ngei rawh se–hlauh nei lo leh inthlahrung loin.