Kawngah sorkar ṭang lehzual rawh se

Truck kaihhnawih pawl pahnih–Mizoram Truck Owners Association leh Mizoram Truck Drivers Association ruahman angin nimin aṭang khan Vairengte leh Sairang inkar kawng a chhiat em avangin he kawngpuiah hian truck an tlàntir duh lo a, an la tlân lo zel rih dawn niin a lang.

Truck neitu leh khalhtu pawlte'n tlàn rih loh an tum thu an puan hnuah Mizoram sorkar chuan kawngpui chhia thawm ṭhat hna an ṭan ve leh mai niin a lang. Eng ngati nge truck pawlte'n thâwm an neih hma khan kawng an siam mai loh, tih hi ngaihdan awm thei tak a ni. Mizoramah hnathawh hun (working season), ruahsur loh hun a tlem tehlul nen, hnathawh hun ṭha tam tak an khawhral tawh tihna a ni.

NH kawngpui tam zawk hi Mizoram sorkar enkawl a ni tawh lo a, NHIDCL enkawl a ni tawh. Mahse, state sorkarin engkawl chin a la nei nuala sawi a ni. NHIDCL enkawl a ni emaw, state sorkar enkawl a ni emaw, Mizoram leh a chhunga chengte mamawh chu kawngpui ṭha a ni.

Ṭhál laia Mizoram châk lak luhna ber kawngpui chhe lutuk vanga truck-te an tlân duh lo hial hi thil mak a ni a, Mizoram chanchina thleng khát tak a ni. Mizoram sorkar hi ṭang lehzual se, kawngpui ṭha neih hi mutmawh hnàrmawhah nei rawh se. Kawngpui a siam theih chinah chuan lungawi lohna lantir hmanga nawr kal ngai loin hma la zung zung ṭhin se, a enkawl chin ni loah pawh kawng enkawltute na taka nawr ṭhin a ngai.

Truck-te hi an pawimawh em em a, Mizoram pumpui ni tin mamawh zawng zawng rawn phur luttu an ni. Rei lo tê pawh an tlàn loh chuan Mizoramin a tuar nghal thuai ṭhin. An pawimawhzia hi hriain, truck neitute leh khalhtute pawhin Mizoram leh mipui hmangaihna thinlung nen harsatna thlen rei loh dan kawng an zawn a ṭul.

Tunah kawng siam mek mah se, duhthusam ang tak kawngpui a ni nghal mai thei dawn lo. Truck neitu leh khalhtute'n hei hi an hriat a ngai. Duhthusam ang kawng a ni rih lo a nih pawhin, a chhe zualpui thawm ṭhat a nih a, tlàn theih nâw nâw a nih veleh tlân leh nghal vat se a duhawm.